Live Updates

الخدمت فاؤنڈیشن کی جانب سے غزہ کیلئے 26 ویں امدادی کھیپ اردن پہنچ گئی

پیر 28 اپریل 2025 23:34

لاہور (اُردو پوائنٹ اخبارتازہ ترین - آن لائن۔ 28 اپریل2025ء) الخدمت فاؤنڈیشن پاکستان کی جانب سے غزہ کے جنگ زدہ عوام کے لئے 40 ٹن امدادی سامان اردن کے دارالحکومت عمان پہنچ گیا، فلسطین کے مظلوم مسلمانوں کے لئے اہل پاکستان کی جانب سے الخدمت فاؤنڈیشن نے کراچی سے امدادی سامان روانہ کیا۔ الخدمت فاؤنڈیشن کے صدر ڈاکٹر حفیظ الرحمن کا کہنا تھا کہ حکومت پاکستان اور نیشنل ڈیزاسٹر مینجمنٹ اتھارٹی کے تعاون سے بھیجے جانے والے امدادی سامان میں 20 ٹن ادویات، 05 ٹن ہائی جین کٹس اور 15 ٹن خیمے شامل ہیں۔

الخدمت فاؤنڈیشن پاکستان نے رمضان المبارک کے موقع پر غزہ کے محصور اور متاثرہ عوام کی مدد کے لئے 900 ٹن امدادی سامان فضائی کارگو کے ذریعے روانہ کرنے کا فیصلہ کیا تھا لیکن بدقسمتی سے مصر و اردن کے تمام سرحدی راستوں کی بندش کی وجہ سے رمضان المبارک کے دوران یہ امدادی سامان غزہ تک نہ پہنچ سکا۔

(جاری ہے)

امدادی سامان کی ترسیل حکومت پاکستان، الخدمت فاؤنڈیشن پاکستان اور رائل میڈیکل سروسز آف جورڈن کی مسلسل سفارتی اور انتظامی کوششوں کے نتیجے میں ممکن بنائی جا سکی۔

ڈاکٹر حفیظ الرحمن نے بتایا کہ الخدمت فاؤنڈیشن پاکستان کے لاہور اور کراچی کے گوداموں میں موجود 900 ٹن امدادی سامان کی روانگی کے لئے تیاریاں مکمل کی جا چکی ہیں۔ آئندہ دنوں میں ادویات، خیموں، ترپال، سلیپنگ بیگز اور ٹن فوڈ پر مشتمل یہ سامان 6 سے 7 طیاروں کے ذریعے مرحلہ وار اردن اور مصر کے ذریعے غزہ بھیجا جائے گا۔ اس سے قبل الخدمت فاؤنڈیشن کی جانب سے حکومت پاکستان، نیشنل ڈیزاسٹر مینجمنٹ اتھارٹی، جارڈن ہاشمائٹ چیریٹی آرگنائزیشن اور رائل میڈیکل سروسز کے تعاون سے 19 طیاروں اور 4 بحری جہازوں کے ذریعے 6 ارب روپے مالیت کا 3800 ٹن امدادی سامان مصر اور اردن کے راستے غزہ پہنچا۔