Live Updates

بھارت کا فرانس سے مزید 26 رافیل طیارے خریدنے کا معاہدہ

پیر 28 اپریل 2025 19:15

نئی دہلی (اُردو پوائنٹ اخبارتازہ ترین - این این آئی۔ 28 اپریل2025ء)بھارتی وزارت دفاع نے کہا ہے کہ بھارت نے فرانس سے اپنی بحریہ کے لیے 26 رافیل لڑاکا طیارے خریدنے کا معاہدہ کیا ہے جس میں سنگل اور ٹو سیٹ طیارے دونوں شامل ہوں گے۔غیر ملکی میڈیاکے مطابق بھارتی وزارت دفاع کے ترجمان نے بتایا کہ ہم نے فرانس سے 26 رافیل طیاروں کے لیے معاہدے پر دستخط کر دیے ہیں۔

یورپی ملک کی جانب سے ان طیاروں کی فراہمی کے بعد یہ پہلے سے موجود 36 رافیل طیاروں میں شامل ہو جائیں گے جو نئی دہلی پہلے ہی فرانس سے حاصل کر چکی ہے۔بھارتی حکومت نے پہلی بار 2023 میں فرانس کے قومی دن (بیسٹیل ڈی) کے موقع پر نریندر مودی کے دورہ فرانس کے دوران 26 رافیل طیارے خریدنے کا ارادہ ظاہر کیا تھا۔فرانسیسی ایرو اسپیس کمپنی ڈاسو ایوی ایشن کے تیار کردہ یہ طیارے بھارتی ساختہ طیارہ بردار بحری جہازوں سے اڑان بھریں گے اور روسی ساختہ مگ-29 کے طیاروں کی جگہ لیں گے۔

(جاری ہے)

بھارتی وزارت دفاع کے بیان کے مطابق رافیل میرین ایک کیریئر سے اڑان بھرنے والا مکمل طور پر لڑاکا طیارہ ہے، جس کی سمندری ماحول میں آپریشنل صلاحیتیں ثابت شدہ ہیں،ان طیاروں کی فراہمی 2030 تک مکمل کر دی جائے گی جب کہ عملے کو فرانس اور بھارت میں تربیت دی جائے گی۔بھارتی میڈیا رپورٹس کے مطابق اس معاہدے میں بھارتی بحریہ کی تربیت، سازوسامان، ہتھیار اور دیگر متعلقہ لاجسٹک معاونت بھی شامل ہے۔

اگرچہ تاریخی طور پر روس بھارت کا سب سے بڑا فوجی ساز وسامان فراہم کرنے والا ملک رہا ہے لیکن اب بھارت فرانس، امریکا اور اسرائیل جیسے ممالک سے بھی اہم دفاعی سازوسامان خرید رہا ہے۔یہ معاہدہ بھارت کے فرانسیسی فوجی ساز وسامان پر انحصار کی ایک اور واضح مثال ہے، جس میں 1980 کی دہائی میں خریدے گئے میراج 2000 طیارے اور 2005 میں آرڈر دیے گئے سکورپین کلاس آبدوزیں شامل ہیں۔