آصف علی زرداری نے ارسا ایکٹ پر دستخط کر کے سندھ کے پانی کا سودہ کیا ،حلیم عادل شیخ

کراچی (اُردو پوائنٹ اخبارتازہ ترین - این این آئی۔ 28 اپریل2025ء)پاکستان تحریک انصاف (پی ٹی آئی)سندھ کے صدر حلیم عادل شیخ نے ملیر میں جاری وکلا برادری کے دھرنے میں شرکت کی۔ وہ گلشن حدید لنک روڈ پر متنازعہ کینال منصوبوں کے خلاف احتجاج میں پی ٹی آئی رہنماں کے ہمراہ شریک ہوئے۔ ان کے ہمراہ پی ٹی آئی کی سینیئر رہنما اور کارکنان کی بڑی تعداد بھی موجود تھی۔

دھرنے کے دوران میڈیا سے گفتگو کرتے ہوئے حلیم عادل شیخ نے سندھ بھر کی وکلا برادری کو خراج تحسین پیش کرتے ہوئے کہا کہ انہوں نے صوبے کے ایک نہایت اہم مسئلے پر یکجہتی کا مظاہرہ کرتے ہوئے جدوجہد کی ہے۔ انہوں نے وکلا پر گزشتہ دنوں پولیس کی جانب سے کی گئی پولیس تشدد کی شدید الفاظ میں مذمت کرتے ہوئے کہا کہ وکلا برادری ثابت قدم ہے اور اپنے موقف پر ڈٹی ہوئی ہے۔

(جاری ہے)

حلیم عادل شیخ نے کہا کہ صدر آصف علی زرداری نے ارسا (انڈس ریور سسٹم اتھارٹی) ایکٹ پر دستخط کر کے سندھ کے پانی کا سودہ کیا، جبکہ تحریک انصاف کے دور میں یہی ایکٹ سابق صدر ڈاکٹر عارف علوی کے پاس لایا گیا تھا مگر انہوں نے سندھ کے مفادات کا سودا کرنے سے انکار کر دیا تھا۔ انہوں نے الزام عائد کیا کہ پیپلزپارٹی نے اقتدار کی لالچ میں سندھ کے وسائل کو بیچ دیا ہے، مگر اب صوبے کی عوام بیدار ہو چکی ہے اور مزید دھوکہ برداشت نہیں کرے گی۔

پی ٹی آئی سندھ کے صدر نے کہا کہ آج کا سی سی آئی (کونسل آف کامن انٹرسٹ) اجلاس وکلا برادری کی انتھک جدوجہد کا نتیجہ ہے۔ عوام اب کسی دو نمبر فیصلے کو قبول نہیں کرے گی۔ انہوں نے واضح کیا کہ پوری سندھ کی ایک ہی آواز ہے کہ دریائے سندھ پر متنازعہ کینال منصوبوں کو ہمیشہ کے لیے ختم کیا جائے۔ ان کا کہنا تھا کہ دریائے سندھ کا پانی سندھ کی زندگی کی ضمانت ہے، اور اگر کسی نے عوام کی زندگی چھیننے کی کوشش کی تو سخت ردعمل آئے گا۔

حلیم عادل شیخ نے مزید کہا کہ گزشتہ سترہ سال سے پیپلزپارٹی نے سندھ کے وسائل کی لوٹ مار کی ہے، اور اب عوام نے اس جماعت کو مکمل طور پر مسترد کر دیا ہے۔ ان کا کہنا تھا کہ پیپلزپارٹی زرداری مافیا کی ایک عوام دشمن جماعت بن چکی ہے اور آئندہ انتخابات میں سندھ سے پیپلزپارٹی کا صفایا ہو جائے گا۔ انہوں نے دعوی کیا کہ آنے والے انتخابات میں پیپلزپارٹی کو سندھ میں ایک بھی نشست نہیں ملے گی، کیونکہ عوام اب ان لوگوں کو ووٹ نہیں دے گی جنہوں نے اپنی دھرتی کا سودا کیا ہو۔