پاکستانی عازمین حج سعودی عرب میں اللہ کے مہمان ہیں اور پاکستان کے سفیر ہیں، وزیر مذہبی امور سردار محمد یوسف

اسلام آباد(اُردو پوائنٹ اخبارتازہ ترین - این این آئی۔ 29 اپریل2025ء)وفاقی وزیر مذہبی امور سردار محمد یوسف نے کہا ہے کہ پاکستانی عازمین حج سعودی عرب میں اللہ کے مہمان ہیں اور پاکستان کے سفیر ہیں، سعودی قوانین، ثقافت اور نظم و ضبط کا خاص خیال رکھنا ان کی ذمہ داری ہے‘اس سال کے حج انتظامات سابقہ ادوار سے مختلف ہوں گے اور بہتری کا واضح فرق نظر آئے گا۔

وہ پاکستانی عازمین حج کی پہلی پرواز کی روانگی کے موقع پر اظہار خیال کر رہے تھے۔پاکستان سے حج 2025 کی پہلی پرواز حجاج کرام کو لے کر سعودی عرب روانہ ہو گئی۔ وفاقی وزیر مذہبی امور و بین المذاہب ہم آہنگی سردار محمد یوسف اور سعودی عرب کے سفیر نواف بن سعید المالکی اسلام آباد ایئرپورٹ پر موجود تھے۔وفاقی وزیر نے روانگی سے قبل ایئرپورٹ پر حج امیگریشن کے عمل کا جائزہ لیا اور انہیں ''روڈ ٹو مکہ'' منصوبے کے تحت کیے گئے انتظامات پر تفصیلی بریفنگ دی گئی۔

(جاری ہے)

عازمین حج سے خطاب کرتے ہوئے سردار محمد یوسف نے کہا کہ آج اس مقام پر موجود ہونا میرے لیے باعثِ فخر اور اعزاز ہے۔ ہم اللہ کے مہمانوں کو حج کی ادائیگی کے لیے حجازِ مقدس روانہ کر رہے ہیں۔انہوں نے کہا کہ پاکستانی عازمین حج سعودی عرب میں نہ صرف اللہ کے مہمان ہیں بلکہ پاکستان کے سفیر بھی ہیں، اس لیے سعودی قوانین، ثقافت اور نظم و ضبط کا خاص خیال رکھنا ان کی ذمہ داری ہے۔

وفاقی وزیر نے کہا کہ وہ خود بھی جلد سعودی عرب جا کر انتظامات کا جائزہ لیں گے اور حجاج کرام کو درپیش مسائل کے فوری حل کے لیے ہر ممکن اقدام کریں گے۔انہوں نے مزید کہا کہ سعودی حکومت نے وی آئی پی حج کی سہولت دینے کی پیشکش کی تھی لیکن میں نے اپنے حجاج کے درمیان رہنے کو ترجیح دی۔سردار محمد یوسف نے کہا کہ اس سال کے حج انتظامات سابقہ ادوار سے مختلف ہوں گے اور بہتری کا واضح فرق نظر آئے گا۔

انہوں نے بتایا کہ محدود وسائل کے باوجود حاجیوں کو زیادہ سے زیادہ سہولیات فراہم کرنے کی کوشش کی گئی ہے، جن میں ہر حاجی کو ایک سم اور موبائل ایپ فراہم کی جا رہی ہے جس کی مدد سے منیٰ میں راستہ بھٹکنے کی صورت میں رہنمائی حاصل کی جا سکے گی۔انہوں نے حاجیوں سے درخواست کی کہ وہ پاکستان کی سلامتی، ترقی اور خوشحالی کے لیے خصوصی دعائیں کریں کیونکہ دعاؤں میں بڑی تاثیر ہے۔

وفاقی وزیر نے بتایا کہ اس سال اسلام آباد اور کراچی سے 50 ہزار سے زائد عازمین ''روڈ ٹو مکہ'' منصوبے کے تحت روانہ ہوں گے۔ آئندہ سال اس سہولت کو دیگر شہروں تک بھی توسیع دینے کی کوشش کی جائے گی۔آخر میں سردار محمد یوسف نے خادم حرمین شریفین شاہ سلمان بن عبدالعزیز اور ولی عہد شہزادہ محمد بن سلمان کا شکریہ ادا کرتے ہوئے ان کے تعاون اور بہترین انتظامات کو سراہا۔