Live Updates

مشترکہ مفادات کونسل کے پلیٹ فارم سے متفقہ فیصلوں کی منظوری وفاق کو مزید مضبوط کرے گی‘سپیکر قومی اسمبلی

منگل 29 اپریل 2025 22:13

اسلام آباد(اُردو پوائنٹ اخبارتازہ ترین - آن لائن۔ 29 اپریل2025ء)سپیکر قومی اسمبلی سردار ایاز صادق نے مشترکہ مفادات کونسل کے فیصلوں پر اظہار اطمینان کرتے ہوئے اس یقین کا اظہار کیا ہے کہ مشترکہ مفادات کونسل کے پلیٹ فارم سے متفقہ فیصلوں کی منظوری وفاق کو مزید مضبوط کرے گی۔ایک بیان میں سپیکر قومی اسمبلی نے نہروں سمیت تمام امور کو اتفاق رائے سے حل کرنے پر وزیر اعظم اور صوبائی وزراء اعلی کی قائدانہ صلاحیتوں کو خراج تحسین پیش کیا۔

سردار ایازصادق نے کہا کہ مشترکہ مفادات کونسل کے پلیٹ فارم سے متفقہ فیصلوں کی منظوری وفاق کو مزید مضبوط کرے گی‘ہماری سیاسی و قومی قیادت نے ہمیشہ قومی مفادات کو ترجیح دی ہے۔مذاکرات مکالمے اور بات چیت سے ہر مسئلہ حل کیا جاسکتا ہے ہماری قومی قیادت نے بالغ نظری کا ثبوت دیا۔

(جاری ہے)

۔سپیکر قومی اسمبلی نے کہاکہ امید کرتا ہوں کہ نہروں کے معاملے پر ہونے والا احتجاج اب ختم کردیا جائے گا۔

مشترکہ مفادات کونسل نے دشمن کوبھی موثر انداز میں اپنے متحد ہونے کا پیغام دیا ہے۔بھارت کو کسی بھی قسم کی جارحیت مہنگی پڑے گی پوری قوم وطن کے دفاع کیلیے سیسہ پلائی دیوار ثابت ہوگی۔سردار ایاز صادق نے کہا کہ پہلگام واقعہ کے بعد بھارت کے جھوٹے الزامات کا پردہ چاک ہوچکا ہے۔بھارت نے ابھی تک پاکستان کی پیشکش کا جواب بھی نہیں دیا۔موجودہ حالات میں ہمیں یک جہتی اتحاد اور ہم آہنگی کی بہت ضرورت ہے۔وزیراعظم شہبازشریف کو بھی مبارکباد پیش کرتا ہوں جنھوں نے تمام امور پر اتفاق رائے کیلیے انتھک کوششیں کیں۔