لاہور میں ڈی سی سید موسیٰ رضا کی قیادت میں تجاوزات کے خلاف زبردست کارروائیاں، شہر کی خوبصورتی بحال

لاہور (اُردو پوائنٹ اخبارتازہ ترین - آن لائن۔ 29 اپریل2025ء) ڈپٹی کمشنر لاہور سید موسیٰ رضا کی براہ راست نگرانی میں انسداد تجاوزات گرینڈ آپریشن نے شہر کے متعدد علاقوں میں خاطر خواہ کامیابیاں حاصل کی ہیں۔ میٹروپولیٹن کارپوریشن لاہور کے چیف آفیسر شاہد عباس کاٹھیا کی سرپرستی میں جاری اس مہم کے دوران شہر کی اہم شاہراہوں سے غیر قانونی قبضے اور تجاوزات ختم کیے گئے ہیں۔

حالیہ کارروائیوں میں 170 املاک سربمہر کی گئیں اور تجاوزات کا سامان لے جانے والے 20 ٹرک ضبط کیے گئے۔ وحدت روڈ، جوبلی ٹاؤن اور نیازی چوک سے سڑک فروشوں اور غیر قانونی قبضوں کو ہٹایا گیا، جبکہ یکی گیٹ، دہلی گیٹ اور بستی سیدن شاہ کے علاقوں سے بھی تجاوزات کا صفایا کیا گیا۔ انتظامیہ نے میو ہسپتال، جین مندر اور نیو انارکلی میں بھی کارروائیاں کیں، جس سے ان علاقوں میں ٹریفک کا بہاؤ بہتر ہوا ہے۔

(جاری ہے)

مہم کے دوران سیکڑوں غیر قانونی بینرز، پوسٹرز اور اسٹریمرز بھی ہٹائے گئے ہیں۔ ضلعی انتظامیہ نے سنگین خلاف ورزیوں پر 4 ایف آئی آرز درج کیں، جبکہ متعدد خلاف ورزی کرنے والوں کو انتباہی نوٹس جاری کیے گئے۔ چیف آفیسر شاہد عباس کاٹھیا نے اعلان کیا ہے کہ تجاوزات کے خلاف کارروائیاں جاری رہیں گی اور انتظامیہ لاہور کو تجاوزات سے پاک شہر بنانے کے لیے پرعزم ہے۔

ڈپٹی کمشنر سید موسیٰ رضا نے کہا کہ "تجاوزات کے خلاف یہ مہم شہر کی خوبصورتی بحال کر رہی ہے۔" انہوں نے یہ بھی بتایا کہ وزیراعلیٰ پنجاب مریم نواز شریف کی خصوصی توجہ تجاوزات سے پاک لاہور پر ہے۔ ڈی سی لاہور کے مطابق، "شہر میں کھلی سڑکوں اور شاہراہوں تک شہریوں کی رسائی بڑھ رہی ہے، جس سے روزمرہ زندگی پر مثبت اثرات مرتب ہو رہے ہیں۔" انسداد تجاوزات آپریشن کے نتیجے میں لاہور کی بڑی شاہراہوں پر ٹریفک کے بہاؤ میں بہتری آئی ہے، جبکہ پیدل چلنے والوں کے لیے فٹ پاتھوں کی دستیابی میں نمایاں اضافہ ہوا ہے۔

ضلعی انتظامیہ لاہور کا کہنا ہے کہ شہری سہولیات کو بہتر بنانے اور شہر کی خوبصورتی بحال کرنے کے لیے یہ کارروائیاں منظم انداز میں جاری رہیں گی۔ خصوصاً قدیم شہر کے تاریخی مقامات کو ان کی اصل حالت میں بحال کرنے کے لیے کوششیں تیز کی جا رہی ہیں۔