کاروباری ہفتے کے دوسرے روز سونے کی قیمت میں 2 ہزار100 روپے کا اضافہ ہوگیا

فی تولہ سونے کی نئی قیمت 3 لاکھ 49 ہزار 200 روپے کی بلند ترین سطح پر پہنچ گئی، دس گرام سونے کی قیمت بھی ایک ہزار 800 روپے بڑھ گئی ہے

ثنااللہ ناگرہ منگل 29 اپریل 2025 20:32

کاروباری ہفتے کے دوسرے روز سونے کی قیمت میں 2 ہزار100 روپے کا اضافہ ہوگیا

کراچی ( اردوپوائنٹ اخبار تازہ ترین۔ آئی پی اے ۔ 29 اپریل 2025ء ) عالمی مارکیٹ میں سونے کی قیمتوں میں اتار چڑھاؤ کا سلسلہ جاری ہے، عالمی منڈی میں سونے کے نرخ بڑھنے پر پاکستان میں بھی قیمتوں میں نمایاں اضافہ ہوگیا ہے۔ میڈیا رپورٹ کے مطابق عالمی مارکیٹ میں سونے کی قیمتوں میں اضافہ ہونے کے باعث پاکستان میں بھی سونے کی قیمت بڑھ گئی ہے۔ بڑے اضافے کے بعد فی تولہ سونے کی نئی قیمت بلند ترین سطح پرپہنچ گئی ہے۔

آج ملک میں فی تولہ سونے کی قیمت میں 2 ہزار100 روپے کا تاریخی اضافہ ہوا ہے۔ فی تولہ سونے کی قیمت بڑھنے کے بعد مقامی صرافہ بازاروں میں نئی قیمت 3 لاکھ 49 ہزار 200 روپے کی بلند ترین سطح پر پہنچ گئی ہے۔ اسی طرح دس گرام سونے کی قیمت بھی بڑھ گئی ہے۔ 10 گرام سونے کی قیمت میں ایک ہزار 800 روپے کا اضافہ ہوا ہے۔

(جاری ہے)

نئی قیمت 2 لاکھ 99 ہزار 382 روپے کی سطح پر پہنچ گئی ہے۔

دوسری جانب انٹربینک مارکیٹ میں امریکی ڈالر کے مقابلے میں پاکستانی روپے کی قدر میں اضافہ ریکارڈ کیا گیا ہے۔سٹیٹ بینک کے مطابق منگل کو انٹربینک مارکیٹ میں امریکی ڈالر کے مقابلے میں پاکستانی روپے کی قدر میں 04 پیسے کا اضافہ ریکارڈ کیا گیا ہے جس کے بعد اس کی نئی قیمت 281 روپے 02 پیسے ہو گئی ہے۔ انٹربینک مارکیٹ میں سعودی ریال کی قدر 74 روپے 91 پیسے جبکہ بحرینی دینار کی قدر 745 روپے 46 پیسے رہی۔

اسی طرح عمانی ریال کی انٹربینک مارکیٹ میں قدر 729 روپے 93 پیسے رہی، کویتی دینار کی قدر 917 روپے 55 پیسے اور قطری ریال کی قدر 77 روپے 10 پیسے ریکارڈ کی گئی دوسری جانب اوپن مارکیٹ میں امریکی ڈالر کی قیمت خرید 281 روپے 40 پیسے اور قیمت فروخت 282 روپے 90 پیسے ریکارڈ کی گئی۔ مزید برآں عالمی بینک نے پاکستان کیلیے 108 ملین ڈالر کی اضافی فنانسنگ کی منظوری دے دی۔ عالمی بینک کی جانب سے جاری اعلامیے میں کہا گیا کہ پاکستان کیلئے 108 ملین ڈالر کی اضافی فنانسنگ کی منظوری دی گئی ہے۔ رورل ایکسیسبیلٹی پروجیکٹ کیلئے 78 ملین ڈالر کی منظوری دی گئی ہے اور اس منصوبے سے منڈیوں اور ملازمتوں تک رسائی کو بہتر بنایا جائے گا۔