Live Updates

گورنرخیبرپختونخوا کی زیرصدارت ایڈورڈز کالج پشاورکے 16ویں بورڈ آف گورنرز کا اجلاس

اجلاس میں ایڈورڈز کالج کے مستقل پرنسپل کی تعیناتی سے متعلق سرچ کمیٹی نے اپنی سفارشات پیش کیں

بدھ 30 اپریل 2025 19:40

پشاور(اُردو پوائنٹ اخبارتازہ ترین - این این آئی۔ 30 اپریل2025ء)گورنرخیبرپختونخوا فیصل کریم کنڈی کی زیرصدارت ایڈورڈز کالج پشاورکے 16ویں بورڈ آف گورنرز کا اجلاس گورنرہاوس میں منعقدہوا۔ اجلاس میں ایڈورڈز کالج کے مستقل پرنسپل کی تعیناتی سے متعلق سرچ کمیٹی نے اپنی سفارشات پیش کیں ۔سرچ کمیٹی کی سفارشات پر اراکین بورڈآف گورنرز نے ایڈورڈز کالج پشاور کے مستقل پرنسپل تعیناتی کی منظوری دے دی ۔

سرچ کمیٹی کی سفارشات پر بورڈآف گورنرز اراکین نے ڈاکٹریعقوب بنگش کی بطور پرنسپل ایڈورڈز کالج تعیناتی کی منظوری دی گئی ۔اجلاس میں سرچ کمیٹی کی جانب سے مستقل پرنسپل کی تعیناتی کے طریقہ کار،شارٹ لسٹنگ، انٹرویو،مجموعی قابلیت معیار سے متعلق بریفنگ دی گئی۔اجلاس کو بتایاگیاکہ سرچ کمیٹی 15 امیدواروں میں سے 12 امیدواروں کا انٹرویو کیا،جن میں سے مجموعی قابلیت کے مطابق 3 امیدواروں پر مشتمل پینل ترتیب دیاگیا۔

(جاری ہے)

بورڈآف گورنرز اراکین نے تین امیدواروں کی پینل میں سے سرفہرست ٹاپ پوزیشن ہولڈر ڈاکٹریعقوب بنگش کی بطور پرنسپل تعیناتی کی منظوری دی۔گورنرخیبرپختونخوا نے سرچ کمیٹی کے اراکین کوطے کردہ طریقہ کار اور مقررہ وقت میں پرنسپل تعیناتی کا مرحلہ مکمل کرنے پر سراہااور کہاکہ انتہائی افسوس تھا کہ عرصہ دراز سے ایڈورڈکالج مستقل پرنسپل تعیناتی سے محروم رہا،گورنر کا عہدہ سنبھالنے ہی عزم کیا تھا کہ ایڈورڈز کالج کا مستقل پرنسپل جلد از جلد تعینات کروں گا۔

انہوں نے کہاکہ مستقل پرنسپل کی تعیناتی میں سنجیدہ کوششوں پر بورڈاراکین اور سرچ کو کمیٹی کو مبارکبادپیش کرتاہوں،عرصہ دراز سے مستقل پرنسپل کی عدم تعیناتی سے کالج کے تعلیمی،مالی و انتظامی معاملات شدید متاثر ہوئے،ایڈورڈز کالج نہ صرف خیبرپختونخوا میں بلکہ پاکستان میں ایک مقبول تاریخی تعلیمی درسگاہ کی حیثیت رکھتا ہے۔اجلاس میں ایگزیکٹیو ڈائریکٹرغلام اسحاق خان انسٹیٹیوٹ شکیل درانی، امتیاز حسین گیلانی، ناصر علی خان، ڈاکٹر قبلہ ایاز،بشپ مانورمل شاہ،پروفیسر شجاعت علی، سارہ صفدر، محکمہ اعلی تعلیم، محکمہ خزانہ کے نمائندوں سمیت بورڈ کے دیگر اراکین شریک تھے۔