Live Updates

بھارت کی کسی بھی جارحیت کا منہ توڑ جواب دیا جائے گا، مریم اورنگزیب

جمعرات 1 مئی 2025 14:16

لاہور (اُردو پوائنٹ اخبارتازہ ترین - اے پی پی۔ 01 مئی2025ء) سینئر صوبائی وزیر مریم اورنگزیب نے اپنے اہم بیان میں بھارت کو سخت وارننگ دیتے ہوئے کہا ہے کہ اگر بھارت نے پاکستان کی سرحد پار کرنے کی کوشش کی تو یہ اس کی تاریخی بھول ہوگی۔ انہوں نے کہا کہ پورا پاکستان اپنی بہادر افواج کے ساتھ چٹان کی طرح کھڑا ہے ، بھارت کسی غلط فہمی میں نہ رہے۔مریم اورنگزیب نے کہا کہ جس قسم کی جارحیت کی جائے گی، پاکستان اسی شدت سے منہ توڑ جواب دے گا۔

(جاری ہے)

انہوں نے کہا کہ ہم پہلگام واقعہ کے متاثرہ خاندانوں سے یکجہتی کا اظہار اور ان کے لیے انصاف کا مطالبہ کر رہے ہیںجبکہ بھارتی حکومت اپنے ہی شہریوں کے خون پر سیاست کر رہی ہے۔انہوں نے مزید کہا کہ دوست ممالک سمیت دنیا بھر کو معلوم ہو چکا ہے کہ امن کا حقیقی دشمن اور دہشت گردوں کا سرپرست بھارت ہے۔ پاکستان ایک پرامن ملک ہے، لیکن اگر جنگ مسلط کی گئی تو اس کا انجام بھارت خود لکھے گا۔مریم اورنگزیب نے کہا کہ پاکستانی قوم دشمن کے غرور کو خاک میں ملانے کے لیے مکمل تیار ہے، اللہ کے فضل سے ہم ہر چیلنج کا مقابلہ کرنے کی صلاحیت رکھتے ہیں۔