Live Updates

برطانوی میڈیا نے پہلگام فالس فلیگ آپریشن میں بھارتی جھوٹ کا پردہ چاک کردیا

جمعہ 2 مئی 2025 03:50

لندن (اُردو پوائنٹ اخبارتازہ ترین - این این آئی۔ 02 مئی2025ء)پہلگام فالس فلیگ آپریشن کے بعد برطانوی میڈیا نے پہلگام واقعہ میں بھارتی جھوٹ کا پردہ چاک کردیا۔ذرائع نے کہا کہ پہلگام فالس فلیگ حملے میں مودی، بھارتی فوج اور انٹلیجنس ایجنسیوں کی ناکامی پر تنقید کا سلسلہ جاری ہے، بی بی سی نے پہلگام حملے کیحوالے مودی سرکار اور انٹلیجنس ایجنسیوں کے کردار پر سوالات اٹھا دئیے۔

ذرائع کے مطابق پہلگام حملے میں ہلاک ہونیوالے سیلیش بھائی کلاٹھیا کی بیوہ شیتل کلاٹھیا تعزیت کیلئے آنے والے وزیر پر برس پڑیں، شیتل کلاٹھیا نے کہا کہ آپ کے پاس بہت سی وی آئی پی کاریں ہیں لیکن ٹیکس دینے والوں کا کیا ہے، پہلگام میں 26افراد مارے گئے وہاں نہ تو کوئی سیکیورٹی تھی اور نہ ہی میڈیکل ٹیم۔

(جاری ہے)

پہلگام حملے میں بال بال بچ جانے والے پارس جین نے دعوی کیا کہ پہلگام کے مقام پر نہ تو کوئی پولیس اہلکار موجود تھا اور نہ ہی فوجی اہلکار۔

بھارتی اخبار دی ہندو کی رپورٹ کے مطابق سی آر پی ایف کا کیمپ حملے کی جگہ سے 7کلومیٹر جبکہ راشٹریہ رائفلز محض 5کلومیٹر دور تھی ۔برطانوی میڈیا نے اپنی رپورٹ میں یہ سوال اٹھایا ہے کہ پہلگام جیسے سیاحتی مقام پر سکیورٹی کیوں موجود نہ تھی ۔پہلگام حملے کے بعد پولیس کم از کم ایک گھنٹے کے بعد جائے وقوعہ پر پہنچی۔ برطانوی میڈیا نے کہاہے کہ پہلگام حملہ سکیورٹی کی مجموعی خامی کا نتیجہ ہے، جس جگہ اتنی بڑی تعداد میں سیاح آتے ہیں وہاں ایک بھی سی سی ٹی وی کیمرہ نصب نہیں۔

دفاعی ماہرین نے کہا کہ برطانوی میڈیا کی یہ رپورٹ ثابت کرتی ہے کہ بھارتی فوج اور اس کی انٹلیجنس پہلگام میں مکمل طور پر ناکام رہے، بھارت کو چاہئے وہ پاکستان پر الزام تراشی کے بجائے اپنی سکیورٹی کی ناکامیوں کو دور کرے، بھارت کے پہلگام فالس فلیگ حملے کے حوالے سے اب ہر جانب سے آوازیں اٹھ رہی ہیں۔