Live Updates

افواج پاکستان ہر چیلنج کا مقابلہ کرنے کی مکمل صلاحیت رکھتی ہیں،گورنر سندھ

ہفتہ 3 مئی 2025 17:41

کراچی(اُردو پوائنٹ اخبارتازہ ترین - این این آئی۔ 03 مئی2025ء) گورنر سندھ کامران خان ٹیسوری نے کہا ہے کہ انسانیت کی خدمت ہمارا دینی اور اخلاقی فریضہ ہے، گورنر سندھ نے روٹری انٹرنیشنل کی خدمات کو سراہتے ہوئے کہا کہ روٹری کی جانب سے دیے گئے 10 ملین ڈالرز کی امداد سے پاکستان میں کئی فلاحی منصوبے جاری ہیں۔ان خیالات کا اظہار انہوں نے روٹری انٹرنیشنل ڈسٹرکٹ کانفرنس 2025 سے خطاب کرتے ہوئے کیا۔

گورنر سندھ نے کہا کہ بھارتی وزیر اعظم نریندر مودی نے بھارت میں زیر علاج پاکستانیوں کو واپس بھجوا کر انسانیت کی خدمت کے خلاف قدم اٹھایا، اس کے برعکس روٹری پاکستان نے اپنے فنڈز سے بھارت کے 1500 بچوں کا علاج کرایا، انہوں نے کہا کہ یہی وہ فرق ہے جو ہماری اقدار اور انسان دوستی کو واضح کرتا ہے۔

(جاری ہے)

گورنر سندھ نے خطے میں بڑھتی ہوئی کشیدگی پر تشویش کا اظہار کرتے ہوئے کہا کہ پاکستان اور بھارت کے درمیان حالات دن بہ دن خراب ہو رہے ہیں، تاہم پاکستان جنگ میں پہل نہیں کرنا چاہتا، مگر اپنے دفاع کا مکمل حق رکھتا ہے۔

انہوں نے مزید کہا، "بھارت یاد رکھی! ہم گرانا بھی جانتے ہیں، اور جو معافی مانگے اسے چائے بھی پلانا جانتے ہیں۔"کامران خان ٹیسوری نے کہا کہ پاکستانی قوم 1947 سے بھارت کے سامنے سینہ تان کر کھڑی ہے۔ ان کا کہنا تھا، "پیار کرو گے تو پیار ملے گا، آنکھیں دکھاؤ گے تو آنکھیں نکال لیں گے۔" گورنر سندھ نے قوم کو یقین دلاتے ہوئے کہا کہ فکر کی کوئی ضرورت نہیں کیونکہ ہماری افواج ہر چیلنج کا مقابلہ کرنے کی مکمل صلاحیت رکھتی ہیں۔