پروفیسر جہاں آرا کی قیادت میں ڈاؤ یونیورسٹی ترقی کی نئی راہوں پر گامزن ہوگی، پیپلز میڈیکل ونگ

کراچی(اُردو پوائنٹ اخبارتازہ ترین - این این آئی۔ 04 مئی2025ء)ڈاؤ یونیورسٹی آف ہیلتھ سائنسز کی نئی ایکٹنگ وائس چانسلر پروفیسر جہاں آرا حسن کی تقرری پر پیپلز میڈیکل ونگ کے سینئر رہنماؤں نے بھرپور خوشی اور نیک تمناؤں کا اظہار کیا ہے۔ اس موقع پر رائو قاسم، قائم علی جوکھیو، محمد مشتاق، جی ایم راجپوت، شہزاد اعوان، محمد اویس احمد اور عطا بھائی نے پروفیسر جہاں آرا کو دل کی گہرائیوں سے مبارکباد دی اور ان کے نئے عہدے کے لیے نیک خواہشات کا اظہار کیا۔

اس سلسلے میں خصوصی ملاقات میں پیپلز میڈیکل ونگ کے رہنماؤں نے پروفیسر جہاں آرا حسن کو سندھ کی ثقافتی پہچان ''اجرک'' پیش کی۔ اس کے علاوہ انہیں پھولوں کا گلدستہ بھی پیش کیا گیا ۔ملاقات کے دوران پیپلز میڈیکل ونگ کے رہنماؤں نے وائس چانسلر کے ساتھ مکمل تعاون کی یقین دہانی کرائی۔

(جاری ہے)

ان کا کہنا تھا کہ یونیورسٹی کے مسائل کی ترجیحی بنیادوں پر حل کے لیے وہ ہر ممکن مدد فراہم کریں گے۔

خاص طور پر طلبہ، اساتذہ اور ملازمین کے مسائل پر زور دیا گیا اور اس بات کا عہد کیا گیا کہ ان کے حقوق کے لیے ہر سطح پر آواز اٹھائی جائے گی۔رہنماؤں نے پروفیسر جہاں آرا کی قائدانہ صلاحیتوں پر اعتماد کا اظہار کرتے ہوئے کہا کہ ان کی قیادت میں ڈاؤ یونیورسٹی ترقی کی نئی راہوں پر گامزن ہوگی۔ پیپلز میڈیکل ونگ کے رہنماؤں کا یہ بھی کہنا تھا کہ انہیں امید ہے کہ پروفیسر جہاں آرا حسن کی قیادت میں یونیورسٹی میں تعلیمی معیار میں مزید بہتری آئے گی اور تحقیقی شعبوں میں اہم پیشرفت ہوگی۔

اس کے ساتھ ساتھ، یونیورسٹی کے طلبہ، اساتذہ اور ملازمین کی فلاح کے لیے عملی اقدامات کیے جائیں گے۔پروفیسر جہاں آرا حسن کی بطور وائس چانسلر تقرری ڈاؤ یونیورسٹی کی تاریخ کا ایک نیا باب کھول رہی ہے۔ وہ اپنی علم و تجربے کی بنا پر نہ صرف طلبہ کی تعلیمی ترقی میں اہم کردار ادا کریں گی، بلکہ یونیورسٹی کے انتظامی اور فلاحی امور میں بھی بہتری لانے کے لیے پرعزم ہیں۔

یہ تقرری ڈاؤ یونیورسٹی کے لیے ایک اہم لمحہ ہے، اور یہ ظاہر کرتی ہے کہ یونیورسٹی کی قیادت کو محنتی اور قابل شخصیات کے حوالے کیا جا رہا ہے۔ اس موقع پر پیپلز میڈیکل ونگ کے رہنماؤں نے اس بات کا عہد کیا کہ وہ یونیورسٹی کے ہر فیصلے میں وائس چانسلر کی حمایت کریں گے اور ترقی کی راہوں پر یونیورسٹی کو لے جانے میں بھرپور مدد فراہم کریں گے۔