Live Updates

بھارت نے مقبوضہ جموں وکشمیرمیں پانی ذخیرہ کرنے کا کام شروع کر دیا

پیر 5 مئی 2025 22:38

سرینگر (اُردو پوائنٹ اخبارتازہ ترین - این این آئی۔ 05 مئی2025ء)غیرقانونی طورپر بھارت کے زیر قبضہ جموں وکشمیرمیں بھارت نے دو بڑے پن بجلی منصوبوں کے آبی ذخائر کی صلاحیت کو بڑھانے کی کوششیں شروع کردی ہیں جو پاکستان کے ساتھ کئی دہائیوں پرانے سندھ طاس معاہدے کی خلاف ورزدی میں پہلا ٹھوس اقدام ہے۔ کشمیر میڈیا سروس کے مطابق یہ اقدام 1960میں کئے گئے سندھ طاس معاہدے کوبھارت کی جانب سے گزشتہ ماہ معطل کرنے کے بعد سامنے آیا ہے جس کے تحت دونوں ملکوں کے درمیان چھ دریائوں کے پانی کو تقسیم کیاگیا ہے اوراس سے پاکستان کے تقریبا 80فیصد زرعی شعبے کو پانی کی فراہمی یقینی بن گئی ہے۔

پاکستان نے بین الاقوامی قانونی کارروائی کی دھمکی دیتے ہوئے خبردار کیا ہے کہ پاکستان کی طرف پانی کے بہائو کو روکنے یا اس کا رخ موڑنے کی کسی بھی کوشش کو جنگ تصور کیا جائے گا۔

(جاری ہے)

ویب پورٹل بزنس ورلڈ کے مطابق1987اور 2008-09میں تعمیر کیے گئے بالترتیب سلال اور بگلیہارپن بجلی منصوبوں میں پانی کے ذخائر کو بڑھانے کا کام جمعرات سے شروع ہوا ہے۔ بھارت کے سرکاری ادارے این ایچ پی سی اور مقامی حکام کی طرف سے تلچھت ہٹانے کا عمل پاکستان کو پیشگی اطلاع دیے بغیر شروع کیاگیاہے جو سندھ طاس معاہدے میں ایک اہم شق ہے۔

ماہرین نے خبردار کیا ہے کہ مستقبل میں خطے میں موجود نصف درجن سے زائد دیگر پن بجلی منصوبوں میں اس طرح کا عمل دہرانے سے پاکستان میںآبپاشی اور بجلی کی پیداوار کے لئے سنگین اثرات مرتب ہوسکتے ہیں ۔