Live Updates

وفاقی وزیرداخلہ محسن نقوی کی قطر کے وزیراعظم محمد بن عبدالرحمن الثانی سے ملاقات، پہلگام واقعہ سے پیدا صورتحال، پاک قطر تعلقات اور دوطرفہ تعاون بڑھانے پر تبادلہ خیال

منگل 6 مئی 2025 14:54

دوحہ (اُردو پوائنٹ اخبارتازہ ترین - اے پی پی۔ 06 مئی2025ء) وفاقی وزیرداخلہ محسن نقوی نے قطر کے وزیراعظم محمد بن عبدالرحمن الثانی سے ملاقات کی جس میں پاک قطر تعلقات اور دوطرفہ تعاون بڑھانے پر تبادلہ خیال کیا گیا۔ ملاقات میں پاک بھارت کشیدگی اور خطے کی موجودہ صورتحال کے تناظر میں بھی بات چیت ہوئی۔وزیرداخلہ محسن نقوی نے قطر کے وزیر اعظم کو پاک بھارت حالیہ کشیدگی کے حوالے سے پاکستان کے ٹھوس اور اصولی موقف سے آگاہ کیا۔

وزیرداخلہ محسن نقوی نے خطے میں قیام امن کے لئے پاکستان کے جامع اقدامات بارے بریفنگ دیتے ہوئے بتایا کہ پہلگام واقعہ پر بھارت کے بے بنیاد الزامات اور اقدامات سے خطے کے امن کو سنگین خطرات لاحق ہیں۔ پہلگام واقعہ کی غیر جانبدارانہ تحقیقات کی پیشکش پاکستان کے اصولی موقف کو مضبوط کرتا ہے۔

(جاری ہے)

دنیا کو علم ہونا چاہیئے کہ واقعہ کے ماسٹر مائنڈ اور اصل ملزمان کون ہیں اور اس کا بینفشری کون ہے۔

بھارت نے اس واقعہ کی آڑ میں سندھ طاس معاہدے پر وار کیا ہے جو ہمارے لئے لائف لائن ہے ۔ خطے میں دیرپا امن چاہتے ہیں لیکن جارحیت پر خاموش نہیں رہیں گے۔ قطر کے وزیر اعظم نے پاک بھارت کشیدگی میں کمی کے لئے سفارتی کوششوں کی ضرورت پر زور دیتے ہوئے کہا کہ ہم خطے میں عدم کشیدگی کی پالیسی کے حامی ہیں۔ امید ہے کہ سفارتی کوششوں سے کشیدگی کم ہو گی۔ قطر کے وزیر اعظم کا وزیر اعظم محمد شہباز شریف کے لئے نیک خواہشات کا پیغام دیتے ہوئے کہاکہ آپ کے وزیراعظم بہت محنت سے پاکستان کی معیشت کو درست سمت لے کر جارہے ہیں۔ قطر میں پاکستان کے سفیر محمد عامر اور اعلی حکام بھی اس موقع پر موجود تھے۔\932