بھارت نے 24 میزائل مارے، ہمارے 30 شہداء کی جوابدہی کون کرے گا؟

لاہور ( اُردو پوائنٹ اخبارتازہ ترین۔ 07 مئی 2025ء ) سینئر صحافی کا بھارت کیخلاف مزید سخت کارروائی کرنے کا مطالبہ۔ تفصیلات کے مطابق سینئر صحافی محمد مالک نے اے آر وائی نیوز سے گفتگو کرتے ہوئے موجودہ صورتحال کے حوالے سے اہم مطالبہ کر دیا۔

سینئر صحافی نے کہا کہ بھارت نے 24 میزائل مارے، ہمارے 30 شہداء کی جوابدہی کون کرے گا؟ کیا ہمارے لوگوں کی قیمت 5 جہاز ہیں؟ اگر ہم اپنے شہریوں کی جانوں کو عزت نہیں دیں گے تو باہر والے کیوں دیں گے؟ میڈیا ہر ہیڈلائنز ہیں کہ انڈیا کا 1.5 ارب ڈالر کا نقصان ہو گیا ان کے 380ارب ڈالر کے ذخائر ہیں انہیں کچھ فرق نہیں پڑتا ۔

ہم نے علیحدہ ملک اسی لیے حاصل کیا تھا کہ ہم آزادی سے اور خود مختاری سے رہیں، اگر ہر چیز مصلحت کے تحت ہی کرنی ہے تو پھر انڈیا میں میں مسلمان جی رہے ہیں، ہم اسی طرح جی لیں۔

(جاری ہے)

  دوسری جانب وزیر اعظم کے مشیر رانا ثناء اللہ کی جانب سے بھارت کیخلاف مزید کسی کارروائی نہ کرنے کا عندیہ دیے جانے پر سینئر صحافی حامد میر کی جانب سے ردعمل دیا گیا ہے۔

سینئر صحافی نے کہا کہ آپ کا دشمن کسی انٹرنیشنل پریشر کو نہیں مانتا ، کسی انٹرنیشنل بارڈر کو نہیں مانتا ،کسی انٹرنیشنل قانون کو نہیں مانتا۔ کسی ثالثی کو نہیں مانتا ۔ اس نے آپ کا پانی بند کر دیا، آپ کے ملک پر میزائل برسا دئیے صرف اس بنیاد پر کہ اسرائیل اس کے ساتھ ہے؟ تو آپ کیوں ضرورت سے زیادہ دفاعی ہو گئے ہیں؟ آپ کیوں کسی ملک کا پریشر لے رہے ہیں۔

؟ جبکہ اس حوالے سے تحریک انصاف کا بھی شدید ردعمل سامنے آیا ہے۔ تحریک انصاف کی جانب سے جاری بیان میں کہا گیا ہے کہ بھارت نے چُن چُن کر پاکستان کے شہروں اور مساجد کو نشانہ بنایا، درجنوں شہری شہید کئے۔ مگر افسوس کہ رانا ثناء نے ان شہادتوں کا بدلہ نہ لینے کا اعلان کرکے کمزوری اور بزدلی کا مظاہرہ کیا۔ شریف خاندان نے مودی کا نام تک نہ لیا۔

آج پاکستان ایسی کمزور قیادت کے ہاتھوں یرغمال ہے، جو ذاتی مفاد کیخاطر قومی غیرت اور سالمیت کو قربان کر رہی ہے۔ ملک کو عمران خان جیسے دلیر اور بے باک لیڈر کی ضرورت ہے، جو قوم کی آواز بن سکے۔ واضح رہے کہ وزیر اعظم کے مشیر برائے سیاسی امور رانا ثنا اللہ کی جانب سے پاکستان اور بھارت کی موجودہ کشیدہ صورتحال سے متعلق اہم ترین بیان جاری کیا گیا ہے۔

رانا ثناء اللہ نے بڑا پالیسی بیان دیتے ہوئے کہا ہے کہ دنیا کو بتا دیا بھارت مزید کچھ نہیں کرے گا تو ہم بھی کچھ نہیں کریں گے۔ بدھ کے روز صحافیوں سے گفتگو کرتے ہوئے وزیر اعظم کے مشیر نے بھارت کو مزید جواب دینے کے سوالات پر کہا کہ بھارت کو جواب دیا جا چکا ہے، بھارت نے حملہ کیا، ہم نے وعدے کے مطابق بھرپور جواب دے دیا، بھارت مزید کچھ نہیں کرے گا تو ہم نے دنیا کو بتا دیا ہے ہم بھی کچھ نہیں کریں گے۔

رانا ثنا اللہ نے کہا کہ بھارت نے پہل کی تھی، ہم نے نہیں کی تھی، ہم نے بھارت کو جواب دیا، بھارت اب کچھ نہیں کرے گا تو ہم بھی بطور ذمہ دار ریاست کچھ نہیں کریں گے۔ انہوں نے کہا کہ ہم نے دنیا کو ایک بار پھر بتا دیا ہے کہ پہلگام واقعے پر تحقیقات کے لیے تیار ہیں، ہم دنیا کے کسی بھی فورم پر اپنے آپ کو پیش کرنے کے لیے تیار ہیں۔