رضاکارانہ امریکا چھوڑنے پرتارکین کیلئے ہزار ڈالر دینے کا اعلان

وظیفہ ان افراد کو ادا کیا جائے گا جو خود سے ڈیپورٹ ہو کر اپنے آبائی ملک پہنچیں گے،ہوم لینڈ سیکورٹی

منگل 6 مئی 2025 14:57

رضاکارانہ امریکا چھوڑنے پرتارکین کیلئے ہزار ڈالر دینے کا اعلان

واشنگٹن(اُردو پوائنٹ اخبارتازہ ترین - این این آئی۔ 06 مئی2025ء)امریکا میں ٹرمپ انتظامیہ نے کہا ہے کہ وہ رضاکارانہ طور پر اپنے ملک جانے کے لیے آمادگی ظاہر کرنے والے تارکین وطن کو سفری اخراجات کی مد میں ایک ہزار ڈالر دے گی۔غیرملکی خبررساں ادارے کے مطابق ہوم لینڈ سکیورٹی کی سیکریٹری کرسٹی نوم نے ایسے تارکین وطن سے مخاطب ہوتے ہوئے کہا کہ اگر آپ یہاں غیرقانونی طور پر موجود ہیں تو گرفتاری سے بچنے کے لیے خود سے اپنے ملک جانا ایک بہترین، محفوظ اور سب سے سستا طریقہ ہے۔

سیکرٹر ی کرسٹی نوم کا کہنا تھا کہ محکمہ ہوم لینڈ سکیورٹی اب سی بی پی ہوم ایپ کے ذریعے غیرقانونی طور پر مقیم غیرملکیوں کو مالی سفری امداد اور ان کے آبائی ملک واپس جانے کے لیے وظائف پیش کر رہا ہے۔

(جاری ہے)

محکمے نے کہا کہ ایک ہزار ڈالر کا وظیفہ ان افراد کو ادا کیا جائے گا جو خود سے ڈیپورٹ ہو کر اپنے آبائی ملک پہنچیں گے اور ایپ اس کی تصدیق کرے گی۔

ہوم لینڈ سکیورٹی محکمے نے بیان میں مزید کہا کہ خود کو ملک بدر کرنا امریکہ چھوڑنے کا ایک باوقار طریقہ ہے اور یہ غیرقانونی طور پر مقیم غیرملکیوں کو امریکی امیگریشن اینڈ کسٹمز انفورسمنٹ کے سامنے آنے سے بچنے کی اجازت دے گا۔محکمے کے مطابق سفری امداد اور وظیفہ کی ادائیگی کے باوجود بھی یہ اندازہ لگایا گیا ہے کہ سی بی پی ہوم کے استعمال کے ذریعے امریکی بدری کے اخراجات میں تقریبا 70 فیصد کمی آئے گی۔

کہا گیا ہے کہ اس وقت کسی غیردستاویزی تارکین کو گرفتار کرنے، حراست میں لینے اور امریکہ بدر کرنے کی اوسط لاگت 17 ہزار ڈالر سے زائد ہے۔محکمے کے مطابق ہنڈوراس سے تعلق رکھنے والے ایک غیردستاویزی تارک وطن پہلے ہی گھر واپسی کے لیے اس پروگرام سے فائدہ اٹھا چکے ہیں۔امریکی صدر ڈونلڈ ٹرمپ نے اپنی انتخابی مہم کے دوران امریکی ووٹرز سے وعدہ کیا تھا کہ وہ دوبارہ صدر بن کر لاکھوں غیرقانونی تارکین وطن کو ان کے آبائی ملکوں کو واپس بھیجیں گے۔