اسرائیل کا یمن کی الحدیدہ بندرگاہ کو مکمل طور پر تباہ کرنے کا دعوی

بندرگاہ پر حوثیوں کی ایک اہم فیکٹری کو بھی نشانہ بنایا گیا ہے،اسرائیلی عہدیدار

منگل 6 مئی 2025 14:40

اسرائیل کا یمن کی الحدیدہ بندرگاہ کو مکمل طور پر تباہ کرنے کا دعوی

تل ابیب(اُردو پوائنٹ اخبارتازہ ترین - این این آئی۔ 06 مئی2025ء)اسرائیل نے فضائی حملوں میں یمن کی الحدیدہ بندرگاہ مکمل طور پر تباہ کر دی ۔ عرب ٹی وی کے مطابق ایک اسرائیلی عہدیدار نے الحدیدہ کی بندرگاہ پر تقریبا 48 سے 50 بم گرانے کا اعلان کرتے ہوئے کہا ہے کہ اس بمباری سے بندرگاہ مکمل طور پر تباہ ہو گئی۔ انہوں نے کہا کہ بندرگاہ پر حوثیوں کی ایک اہم فیکٹری کو بھی نشانہ بنایا گیا ہے۔

اسرائیلی عہدیدار نے کہا کہ یمن میں اسرائیلی آپریشن ختم ہو چکا ۔ دوسری طرف العربیہ کے ذرائع نے انکشاف کیا کہ الحدیدہ پر حملوں میں 30 سے زائد اسرائیلی طیاروں نے حصہ لیا۔ دوسری جانب اسرائیلی فوج کے ترجمان اویچائی ادرائی نے اعلان کیا کہ ہماری افواج نے یمن میں حوثیوں کے حالیہ حملوں کے جواب میں ان کے کئی اہداف کو نشانہ بنایا ہے۔

(جاری ہے)

انہوں نے ایکس پر جاری بیان میں کہا کہ ہم نے الحدیدہ کی بندرگاہ میں حوثیوں کے اہم بنیادی ڈھانچے کو تباہ کر دیا ہے۔

محافظہ کے مشرق میں واقع باجیل سیمنٹ فیکٹری کو بھی نشانہ بنایا گیا ۔ایک امریکی عہدیدار نے تصدیق کی ہے کہ یمن میں اسرائیلی فضائی حملے امریکا کے ساتھ رابطہ کاری کے بعد کئیگئے۔ امریکی محکمہ دفاع کے ذرائع نے کہا ہے کہ امریکی افواج نیحوثیوں پر اسرائیلی فضائی حملوں میں حصہ نہیں لیا۔یہ حملے اس وقت ہوئے جب امریکا نے حملے سے قبل چند گھنٹوں کے دوران حوثیوں پر اپنے فضائی حملے تیز کر دیئے تھے۔ واضح رہے کہ امریکا 15 مارچ سے یمن میں حوثیوں کے گڑھ پر فضائی حملے کر رہا ہے۔