بلوچستان میں مچھ کے علاقے میں بم دھماکہ، 7 سیکورٹی اہلکار شہید

فورسز کی گاڑی بلوچستان میں مچھ کے علاقے میں دہشتگردوں کی جانب سے نصب ایک آئی ای ڈی سے ٹکرا گئی

محمد علی منگل 6 مئی 2025 20:36

راولپنڈی (اُردو پوائنٹ اخبارتازہ ترین۔ 06 مئی2025ء) بلوچستان میں مچھ کے علاقے میں بم دھماکہ، 7 سیکورٹی اہلکار شہید۔ پاک فوج کے شعبہ تعلقات عامیہ آئی ایس پی آر کے مطابق فورسز کی گاڑی بلوچستان میں مچھ کے علاقے میں دہشتگردوں کی جانب سے نصب ایک آئی ای ڈی سے ٹکرا گئی جس کے نتیجے میں سات جوان شہید ہو گئے ہیں۔ علاقے میں موجود دہشتگردی کو ختم کرنے کے لیے آپریشن جاری ہے اور یہ آئی ای ڈی بھارتی پراکسی کالعدم بی ایل اے نے نصب کر رکھی تھی۔

(جاری ہے)

شہید ہونے والوں میں صوبیدار عمر فاروق، نائیک آصف خان، نائیک مشکور علی، سپاہی طارق نواز، سپاہی واجد احمد، سپاہی محمد عاصم اور سپاہی محمد کاشف خان شامل ہیں آئی ایس پی آر کا کہنا ہے کہ اس گھناؤنے اور بزدلانہ فعل کے مرتکب افراد کو انصاف کے کٹہرے میں لایا جائے گا اور بلوچستان کی ترقی کو سبوتاژ کرنے کی کوششوں کو ناکام بنا دیا جائے گا۔ آئی ایس پی آر کے مطابق پاکستان سیکیورٹی فورسز قوم کے شانہ بشانہ بلوچستان کے امن اور استحکام کے لیے پر عزم ہیں۔ بہادر نوجوانوں کی قربانیاں ہمارے عزم کو مزید تقویت دیتی ہیں۔ پاکستانی سرزمین پر بھارت اور اس کی پراکسیز کے مذموم عزائم کو شکست دیں گے۔