بھارت کے ناظم الامور کی دفترخارجہ طلبی، پاکستان کا بھارتی حملوں پر شدید احتجاج

اسلام آباد ( اُردو پوائنٹ اخبارتازہ ترین۔ 07 مئی 2025ء ) پاکستان نے بھارت کے ناظم الامور کو دفترخارجہ طلب کرلیا۔ ترجمان فارن آفس شفقت علی خان کے مطابق بھارتی ناظم الامور کی دفتر خارجہ طلبی کے دوران پاکستان کی جانب سے بھارتی حملوں پر شدید احتجاج ریکارڈ کرایا گیا ہے، پاکستان نے بھارتی ناظم الامور کو ڈی مارش کر دیا، پاکستان نے بھارت کے بے بنیاد جواز کو سختی سے مسترد کر دیا، جن کی بنیاد پر یہ جارحانہ کارروائیاں کی گئیں۔

انہوں نے بھارت کے پاکستان پر حملے کی مذمت کرتے ہوئے کہا کہ بھارت کی غیر ذمہ دارانہ کارروائی نے دو ایٹمی ریاستوں کو ایک بڑے تصادم کے دہانے پر لا کھڑا کیا ہے، بھارت کی کھلی جارحیت اور بھارتی فضائیہ نے بلااشتعال اور کھلی جنگی کارروائی کے تحت اپنی فضائی حدود میں رہتے ہوئے سٹینڈ آف ہتھیاروں کے ذریعے پاکستان کی خودمختاری کی سنگین خلاف ورزی کی ہے، یہ حملے بین الاقوامی سرحد کے پار مریدکے، بہاولپور اور لائن آف کنٹرول کے پار کوٹلی اور مظفرآباد میں کیے گئے، ان حملوں کا نشانہ عام شہری بنے ہیں۔

(جاری ہے)

شفقت علی خان کا کہنا ہے کہ پہلگام حملے کے تناظر میں بھارتی قیادت نے ایک بار پھر دہشت گردی کا بہانہ بنا کر جھوٹا بیانیہ اپنایا ہے تاکہ خطے کے امن و سلامتی کو داؤ پر لگایا جا سکے، بھارتی جارحیت کے نتیجے میں خواتین اور بچوں سمیت بے گناہ شہری شہید ہوئے، اس حملے سے تجارتی فضائی پروازوں کو بھی شدید خطرات لاحق ہوئے، پاکستان بھارت کی اس بزدلانہ کارروائی کی شدید مذمت کرتا ہے، ایسی کارروائی اقوام متحدہ کے چارٹر، بین الاقوامی قوانین اور بین الریاستی تعلقات کے مسلمہ اصولوں کی صریح خلاف ورزی ہے۔

ترجمان دفتر خارجہ نے کہا کہ بھارت کی غیر ذمہ دارانہ کارروائی نے دو ایٹمی ریاستوں کو ایک بڑے تصادم کے دہانے پر لا کھڑا کیا ہے اور صورت حال تیزی سے بدل رہی ہے، پاکستان اقوام متحدہ کے چارٹر کے آرٹیکل 51 اور بین الاقوامی قانون کے مطابق مناسب وقت اور مقام پر جواب دینے کا حق محفوظ رکھتا ہے، حکومت پاکستان، مسلح افواج اور عوام بھارتی جارحیت کے خلاف متحد ہیں، وہ ہمیشہ پاکستان کی خودمختاری اور علاقائی سالمیت کے تحفظ اور بقا کے لیے فولادی عزم کے ساتھ عمل کریں گے۔