پاکستان اپنے دفاع کی مکمل صلاحیت رکھتا ہے، وفاقی وزیر سائنس و ٹیکنالوجی خالد حسین مگسی

جمعرات 8 مئی 2025 17:43

اسلام آباد (اُردو پوائنٹ اخبارتازہ ترین - اے پی پی۔ 08 مئی2025ء) وفاقی وزیر سائنس و ٹیکنالوجی خالد حسین مگسی نے بھارتی جارحیت کی مذمت کرتے ہوئے کہا ہے کہ بھارت نے غیر مسلح شہریوں خاص طور پر بچوں اور خواتین کو نشانہ بنا کر بزدلی کا مظاہرہ کیا ہے، پاکستان اپنے دفاع کی مکمل صلاحیت رکھتا ہے اور ہم اپنی سرحدوں کے دفاع میں کسی قسم کی کوتاہی نہیں برتیں گے۔

وزارت سائنس و ٹیکنالوجی کی جانب سے جاری بیان کے مطابق ان خیالات کا اظہار انہوں نے جمعرات کو یہاں الکوثر انٹرنیشنل ہسپتال کے افتتاح کے موقع پر کیا۔ خالد حسین مگسی نے کہا کہ پاکستانی قوم اپنی افواج کے شانہ بشانہ کھڑی ہے اور ہر قربانی دینے کے لیے تیار ہے۔ وفاقی وزیر سائنس و ٹیکنالوجی نے ہسپتال کے بنیادی مقصد کو اجاگر کرتے ہوئے کہا کہ الکوثر ہسپتال کا مقصد عوام کو معیاری اور سستی طبی سہولتیں فراہم کرنا ہے۔

(جاری ہے)

انہوں کہا کہ ہسپتال میں جدید ترین طبی آلات اور ماہر ڈاکٹروں کی ٹیم دستیاب ہو گی تاکہ مریضوں کو بہترین علاج فراہم کیا جاسکے۔ وفاقی وزیر نے کہا کہ پاکستان کا عزم مضبوط ہے اور ہم اپنی سرحدوں کی حفاظت کرنے کے لیے ہمیشہ تیار رہیں گے۔ پاکستان اپنی خودمختاری کے دفاع کے لیے کسی بھی قسم کی قربانی دینے سے گریز نہیں کرے گا۔ انہوں نے کہا کہ پاکستان کی فوج ہر محاذ پر دشمن کا مقابلہ کرنے کے لیے تیار ہے اور قوم ہمیشہ اپنی افواج کے ساتھ کھڑی رہے گی۔