بلوچستان فوڈ اتھارٹی کا کوئٹہ اور تربت کے مختلف مراکز کا معائنہ ، 15سے زائد خوراک کے مراکز کے خلاف کارروائی

کوئٹہ (اُردو پوائنٹ اخبارتازہ ترین - اے پی پی۔ 08 مئی2025ء) بلوچستان فوڈ اتھارٹی کی ٹیموں نے کوئٹہ شہر اور ضلع تربت میں خوراک کے مراکز کا معائنہ کیا اور 15سے زائد کارخانوں کے خلاف کارروائی کی۔ترجمان بلوچستان فوڈ اتھارٹی کے مطابق کچلاک بائی پاس کے گردونواح میں قائم خوراک کے مراکز اور پروسیسنگ یونٹس کی چیکنگ کے دوران قوانین کی سنگین خلاف ورزیوں پر ایک آئسکریم پراسیسنگ یونٹ کو سیل کر دیا گیا۔

مذکورہ یونٹ میں غیر رجسٹرڈ آئسکریم اور آئس قلفیوں کی پراسیسنگ جاری تھی جن کی نہ کوئی لیبارٹری رپورٹ موجود تھی اور نہ ہی پیکنگ پر درست لیبلنگ کی گئی تھی۔ یونٹ میں فوڈ سیفٹی سے متعلق متعدد اصولوں کی خلاف ورزیاں بھی پائی گئیں۔ کارروائی کے دوران 1 ڈیپارٹمنٹل اسٹور سے زائدالمیعاد بسکٹ، چپس، جیلی اور بغیر مینوفیکچرنگ یا ایکسپائری تاریخ کی حامل مصنوعات برآمد کی گئیں، جنہیں ضبط کر کے اسٹور انتظامیہ کو جرمانہ عائد کیا گیا۔

(جاری ہے)

دودھ اور دہی کے معیار کی جانچ کے لیے چشمہ اچوزئی، ایئرپورٹ روڈ اور میکانگی روڈ پر موجود ملک شاپس کا معائنہ کیا گیا، جہاں موقع پر کیے گئے ٹیسٹ کے دوران پانچ دکانوں کے دودھ میں خشک دودھ پاؤڈر اور پانی کی ملاوٹ ثابت ہوئی۔ذمہ دار دکانداروں پر جرمانے عائد کیے گئے۔مزید براں، فیض محمد روڈ پر ایک فاسٹ فوڈ کارنر، دو بیکریوں، ایک جنرل اسٹور اور دیگر مراکز کو فوڈ بزنس لائسنس نہ ہونے اور حفظان صحت کے اصولوں کی خلاف ورزی پر جرمانہ کیا گیا۔

اسپنی روڈ پر ایک واٹر پلانٹ اور سات گوشت کی دکانوں کے خلاف بھی مختلف وجوہات پر قانونی کارروائی کی گئی۔کلی پائند کے علاقے میں ایک جنرل اسٹور، ایک بیکری اور دو ہول سیل ٹریڈرز سے ایکسپائرڈ اور پابندی عائد خوردنی مصنوعات برآمد ہوئیں، جنہیں ضبط کر کے مالکان کر جرمانہ کیا گیا۔ علاوہ ازیں ضلع تربت میں بلوچستان فوڈ اتھارٹی کی زونل انسپیکشن ٹیم نے بی آر سی کالج تربت کی مرکزی کینٹین اور میس سمیت شہر میں میں موجود مختلف مراکز خوراک کا معائنہ کیا۔کالج کینٹین انتظامیہ کو معمولی خامیوں پر اصلاحی نوٹس جاری کیے گئے جبکہ تین جنرل اسٹورز پر زائدالمیعاد اشیا فروخت کرنے پر جرمانے عائد کیے گئے۔