موجودہ ہنگامی صورتحال کے پیش نظر الخدمت فائونڈیشن کی ٹیمیں ملک بھر میں مستعد ہیں اور ہر ممکن کردار ادا کر رہی ہیں،سید وقاص جعفری

لاہور (اُردو پوائنٹ اخبارتازہ ترین - اے پی پی۔ 08 مئی2025ء) حالیہ جنگی صورتحال کے پیش نظر الخدمت فائونڈیشن کی ریسکیو اور ریلیف سرگرمیوں کے حوالے سے ہنگامی پریس بریفنگ کا انعقاد کیا گیا جس میں الخدمت فائونڈیشن پاکستان کے سیکرٹری جنرل سید وقاص جعفری، اسسٹنٹ سیکرٹری جنرل اکرام الحق سبحانی، نائب صدر زکر اللہ مجاہد، الخدمت ہیلتھ کے چیئرمین پروفیسر ڈاکٹر محمد زاہد لطیف اور سی ای او خبیب بلال نے شرکت کی۔

سید وقاص جعفری نے اس موقع پربتایا کہ حالیہ ہنگامی صورتحال اور سویلین آبادی پر جارحیت کے نتیجے میں الخدمت فائونڈیشن نے فوری اور موثر اقدامات کا آغاز کر دیا ہے۔ الخدمت فائونڈیشن نے ملک بھر میں اپنے 41الخدمت ریسپانس سینٹرز کو اپڈیٹ کر دیا ہے جبکہ جنوبی پنجاب، وسطی پنجاب، لاہور اور آزاد کشمیر کے چار بڑے ریجنز سمیت مرکزی سطح پر وار کرائسز مینجمنٹ سیلز قائم کیے جا چکے ہیں تاکہ ہنگامی صورتحال میں فوری اور منظم ردعمل دیا جا سکے۔

(جاری ہے)

الخدمت فائونڈیشن نے 15موبائل ہیلتھ یونٹ، 50ایمبولینسیں، ایک کروڑ مالیت کی ادویات، ایک ہزار خیمے، 5ہزار ترپال سمیت امدادی سامان پر مشتمل ٹرک لائن آف کنٹرول اور متاثرہ علاقوںکی جانب روانہ کر دیا ہے۔ اکرام الحق سبحانی نے اس موقع پر کہا کہ الخدمت فاونڈیشن حکومتِ پاکستان، افواجِ پاکستان، نیشنل ڈیزاسٹر مینجمنٹ اتھارٹی ، پراونشل ڈیزاسٹر مینجمنٹ اتھارٹیزاور ریسکیو 1122کے ساتھ مکمل ہم آہنگی اور رابطے میں ہے۔

اس کے ساتھ ساتھ ایک ٹریننگ پروگرام بھی ترتیب دیا جا رہا ہے جس میں ہر عمر کے افراد کو ہنگامی صورتحال سے نمٹنے اور بطور شہری فعال کردار ادا کرنے کے لیے تربیت دی جائے گی۔ انہوں نے کہا کہ اگر خدانخواستہ صورتحال مزید بگڑتی ہے اور اندرونِ ملک نقل مکانی کا خدشہ بڑھتا ہے تو الخدمت فاونڈیشن عارضی خیمہ بستیاں قائم کرے گی اور متاثرہ افراد کیلئے نقل و حمل کی سہولیات بھی فراہم کی جائیں گی۔

پروفیسر ڈاکٹر محمد زاہد لطیف نے کہا کہ الخدمت فاونڈیشن نے الخدمت کے 57ہسپتالوں کو ہنگامی حالات کے پیش نظر تیار کر لیا گیا ہے جہاں 30فیصد بیڈز کو جنگی حالات کے لیے مختص کر دیا گیا ہے۔ الخدمت نے 1کروڑ روپے کی ادویات متاثرہ علاقوں کی طرف بھجوا دی ہیں جبکہ پہلے مرحلے میں مزید 10کروڑ روپے مالیت کی ادویات خریدرہے ہیں تاکہ ادویات کا ذخیرہ اپڈیٹ کر لیا جائے اور ضرورت کے وقت فوری فراہمی ممکن ہو۔