سرینگر، سانحہ پیر دستگیر مقبوضہ کشمیرمیں انسانی حقوق کی سنگین پامالیوں کی واضح مثال

جموں و کشمیر میں سانحہ پیر دستگیر کو33برس مکمل ہونے کے باوجود سانحے کی تلخ یادیں کشمیریوں کے ذہنوںمیں تازہ ہیں

جمعہ 9 مئی 2025 16:25

سرینگر(اُردو پوائنٹ اخبارتازہ ترین - این این آئی۔ 09 مئی2025ء)غیر قانونی طور پر بھارت کے زیر قبضہ جموں و کشمیر میں سانحہ پیر دستگیر کو33برس مکمل ہونے کے باوجود سانحے کی تلخ یادیں کشمیریوں کے ذہنوںمیں تازہ ہیں ۔ یہ سانحہ مقبوضہ علاقے میں بھارتی قابض فوجیوں کی طرف سے بڑے پیمانے پر جاری انسانی حقوق کی خلاف ورزیوں واضح مثال ہے ۔کشمیرمیڈیاسروس کے مطابق بھارتی پیراملٹری سنٹرل ریزرو پولیس فورس اور بارڈر سیکورٹی فورس سے وابستہ اہلکاروں نے 8مئی 1991کو سرینگر کے علاقے خانیار میں پیر دستگیرصاحب کی درگاہ کے قریب کچھ شہید کشمیریوں کی تدفین کے لیے جمع ہونے والے ہزاروں افراد پر فائرنگ کی جس کے نتیجے میں 18کشمیری شہری موقع پر ہی شہید ہوگئے۔

فائرنگ سے ایک شیرخوار بچہ اور اس کا والد بھی جاں بحق ہو ا۔

(جاری ہے)

یہ واقعہ مقبوضہ علاقے میں بھارتی ظلم و بربریت اور انسانی حقوق کی سنگین خلاف وزیوں کی واضح مثال ہے ۔دستگیر صاحب200 سال پرانی درگاہ ہے جو خانیار سرینگر میں واقع ہے۔ یہ درگاہ حضرت علی ابن ابی طالب رضی اللہ عنہ کے لکھے ہوئے قرآن پاک کے ایک نسخے کے لیے مشہور اورحضرت عبدالقادرجیلانی ؒ سے منسوب ہے۔

اسے 1806میں تعمیر کیا گیا اور 1877میں خواجہ ثناء اللہ شال نے اس کی توسیع کی تھی۔یہ ایک تلخ حقیقت ہے کہ بھارتی فورسز کومقبوضہ جموں وکشمیر میں پبلک سیفٹی ایکٹ ، آرمڈ فورسز اسپیشل پاورز ایکٹ اورانسداد دہشت گردی کے کالے قوانین کے تحت نہتے شہریوں کے قتل عام اور انسانی حقوق کی سنگین پامالیوں پر مکمل استثنیٰ حاصل ہے ۔ ان کالے قوانین پر انسانی حقو ق کی بین الاقوامی تنظیموں نے بھارت پر کڑی تنقید کی ہے ۔

بھارت کی ریاستی سرپرستی میںکشمیر سے لے کر بھارت تک اقلیتوں کے حقوق کی پامالی کا سلسلہ جاری ہے ، اس طرح بین الاقوامی قوانین اوراصولوں کی خلاف ورزی کی جارہی ہے جو علاقائی امن کے لیے سنگین خطرہ ہے۔ بھارت ایک ظالم ریاست بن چکی ہے جہاں انسانی حقوق اورمساوات ایک خواب بن کر رہ گئے ہیں۔ مغربی طاقتیں جو اکثر انسانی حقوق کے چیمپئن ہونے کا دعویٰ کرتی ہیں، اپنے مفادات کی وجہ سے بھارت کو انسانی حقوق کی اس سنگین صورتحال پر جوابدہ ٹھہرانے میں ناکام رہی ہیں۔سانحہ پیر دستگیر مقبوضہ کشمیرمیں بھارت کے ظلم وبربریت کی ایک واضح مثال ہے ۔