Live Updates

ویب کاپ کا پاکستان کی پہلی خاتون مزدور رہنما کنیز فاطمہ کے انتقال پر اظہارِ تعزیت، مزدور برادری سوگوار

ہفتہ 10 مئی 2025 21:42

کراچی (اُردو پوائنٹ اخبارتازہ ترین - این این آئی۔ 10 مئی2025ء)ورکرز ایمپلائرز بائی لیٹرل کونسل آف پاکستان (ویب کاپ) نے پاکستان کی پہلی ممتاز خاتون مزدور رہنما اور ویب کاپ کی بانی نائب چیئرپرسن کنیز فاطمہ المعروف باجی کے طویل علالت کے بعد انتقال پر گہرے رنج و غم کا اظہار کیا ہے۔ملک بھر سے ویب کاپ کے ارکان نے کنیز فاطمہ کی مزدوروں کے حقوق اور وقار کے لیے کئی دہائیوں پر محیط جدوجہد کو خراجِ تحسین پیش کیا۔

انہوں نے اس بات کو اجاگر کیا کہ کنیز فاطمہ نے ہمیشہ خواتین کے ساتھ مساوی سلوک، انہیں تحفظ فراہم کرنے اور کام کی جگہ پر امتیازی سلوک، ہراسانی اور تشدد کے خلاف بھرپور آواز بلند کی۔کنیز فاطمہ ویب کاپ کی تشکیل میں مرکزی کردار ادا کرنے والی شخصیات میں شامل تھیں اور انہیں متفقہ طور پر نائب چیئرپرسن منتخب کیا گیا۔

(جاری ہے)

یہ عہدہ انہوں نے اپنی صحت کی ناسازی تک بڑی لگن سے نبھایا۔

ان کا مزدور اور صنعتی ترقی کے درمیان توازن برقرار رکھنے کا نظریہ اس وقت بھی نمایاں ہوا جب انہوں نے اس وقت کے صدر جنرل پرویز مشرف کو صنعتی ترقی کے لیے مضبوط پالیسی سازی کا مشورہ دیا۔انہوں نے زندگی بھر خواتین کی لیبر فورس میں شمولیت کو نہ صرف سراہا بلکہ متعدد خواتین کی رہنمائی اور تربیت بھی کی۔ ان کی قیادت نے مزدوروں اور آجرین کے درمیان ایک پل کا کردار ادا کیا، اور انہیں دونوں فریقین کا اعتماد اور احترام حاصل رہا۔پاکستان نے مزدور تحریک کی ایک عظیم رہنما کھو دی ہے ایک ایسی آواز جو دیانت، استقامت اور اتحاد کی علامت تھی۔ ویب کاپ ان کے انتقال پر دلی تعزیت کا اظہار کرتا ہے اور ان کے اہل خانہ، ساتھیوں اور تمام مزدور برادری کے ساتھ غم میں شریک ہے۔