Live Updates

حج پروازوں کا شیڈول معمول کے مطابق بحال کرنے کا اعلان

پاکستان کی فضائی حدود کی مکمل بحالی کے بعد حج پروازیں اب سے شیڈول کے مطابق سعودی عرب روانہ ہوں گی، وزارت مذہبی امور

ہفتہ 10 مئی 2025 20:45

اسلام آباد (اُردو پوائنٹ اخبارتازہ ترین۔ 10 مئی2025ء) وزارت مذہبی امور کا حج پروازوں کا شیڈول معمول کے مطابق بحال کرنے کا اعلان، پاکستان کی فضائی حدود کی مکمل بحالی کے بعد حج پروازیں اب سے شیڈول کے مطابق سعودی عرب روانہ ہوں گی ۔ تفصیلات کے مطابق پاک بھارت کشیدگی میں کمی کے بعد وزارت مذہبی امور کا بھی اہم بیان سامنے آیا ہے۔ ترجمان وزارت مذہبی امور نے کہا ہے کہ حج پروازیں اب سے شیڈول کے مطابق سعودی عرب روانہ ہوں گی۔

وزارت مذہبی امور کے ترجمان نے ہفتہ کو جاری بیان میں کہا کہ پاکستان کی فضائی حدود ہر قسم کی پروازوں کیلئے مکمل بحال کردی گئی ہے اس لئے حج آپریشن بھی شیڈول کے مطابق بحال ہوگیا ہے۔ ترجمان نے کہا کہ فلائٹ آپریشن کی وقتاً فوقتاً بندش کے باعث مجموعی طور پر 10 حج پروازیں منسوخ ہوئیں،جن میں سے لاہور سے تین، اسلام آباد سے دو جبکہ کراچی اور ملتان سے ایک، ایک حج پرواز منسوخ ہوئی ہے۔

(جاری ہے)

ترجمان وزارت مذہبی امور نے کہا کہ فلائٹس منسوخی کے باعث 2 ہزار 290 عازمین کا شیڈول متاثر ہوا ہے۔ ترجمان وزارت مذہبی امور نے کہا کہ ایک ہزار 277 عازمین کو خصوصی پروازوں کے ذریعے روانہ کیا جاچکا ہے، رہ جانے والے ایک ہزار 13 عازمین کو جلد خصوصی پروازوں کے ذریعے سعودی عرب روانہ کردیا جائے گا- ترجمان وزارت مذہبی امور نے کہا کہ اب تک 19 ہزار 669پاکستانی عازمین سعودی عرب پہنچ چکے ہیں- ترجمان وزارت مذہبی امور نے کہا کہ عازمین حج پروازوں کی معلومات کیلئے متعلقہ حاجی کیمپوں سے رابطے میں رہیں۔

واضح رہے کہ پاکستان اور بھارت کے درمیان سیز فائر ہونے کے بعد پاکستان کی فضائی حدود ہر قسم کی پروازوں کے لیے مکمل طور پر بحال کردی گئی جس کا نوٹم جاری کردیا گیا۔ ترجمان پاکستان ایئرپورٹس اتھارٹی کے مطابق ملک کے تمام ائیرپورٹس معمول کے فلائٹ آپریشن کے لیے دستیاب ہیں۔