جوائنٹ ایجوکیشن ایکشن کمیٹی افواج پاکستان کو خراج تحسین پیش کرنے کے لئے14 مئی کو ریلی نکالےگی

منگل 13 مئی 2025 16:20

اسلام آباد (اُردو پوائنٹ اخبارتازہ ترین - اے پی پی۔ 13 مئی2025ء) جوائنٹ ایجوکیشن ایکشن کمیٹی (جے ای اے سی ) کے زیر اہتمام افواج پاکستان کو خراج تحسین پیش کرنے کے لئے14 مئی کو ’’پاک فوج زندہ باد‘‘ ریلی نکالی جائے گی۔ اس سلسلے میں جوائنٹ ایجوکیشن ایکشن کمیٹی کا ہنگامی اجلاس چیئرمین فضل مولا کی صدارت میں ہوا ،جس میں سینئر وائس چیئرمینز ملک امیر خان، رشید خان، اکرم خان کھوسہ، سید منصور احمد شاہ ، سردار صدیق خان اور ترجمان جیک محمد صفتین نے شرکت کی۔

(جاری ہے)

اجلاس میں فیصلہ کیا گیا کہ افواج پاکستان سے اظہار یکجہتی کے لئے 14 مئی کو دن ساڑھے10 بجے پریس کلب اسلام آباد سے شہید ملت سیکرٹریٹ تک ریلی نکالی جائے گی ۔ ریلی میں اسلام آباد کے تعلیمی اداروں کے اساتذہ ، نان ٹیچنگ سٹاف اور طلبہ حالیہ بھارتی جارحیت کے خلاف پاک فوج کی شاندار کارکردگی پر اسے خراج تحسین پیش کریں گے۔ اجلاس میں طے پایا کہ اسلام آباد کے تعلیمی اداروں سے اساتذہ کرام، نان ٹیچنگ سٹاف اور طلبہ اپنی بھرپور شرکت سے پاک فوج سے اظہار یکجہتی اور وطن عزیز کے ناقابل تسخیر دفاع کا اعادہ کریں گے۔