امدادی بندش: غزہ میں غذائی قلت کے باعث 57 بچے ہلاک

اسلام آباد (اُردو پوائنٹ ۔ UN اردو۔ 13 مئی 2025ء) عالمی ادارہ صحت (ڈبلیو ایچ او) نے بتایا ہے کہ غزہ میں 2 مارچ کو امداد کی فراہمی بند ہونے کے بعد 57 بچے غذائی قلت کے باعث ہلاک ہو چکے ہیں جبکہ دیگر کو تاعمر طبی مسائل کا سامنا ہو سکتا ہے۔

ادارے نے خبردار کیا ہے کہ اگر علاقے میں جنگ جاری رہی اور امداد کی ترسیل بحال نہ ہوئی تو آئندہ 11 ماہ میں پانچ سال سے کم عمر کے تقریباً 71 ہزار بچے غذائی قلت کے نتیجے میں جسمانی عوارض کا شکار ہو جائیں گے۔

مقبوضہ فلسطینی علاقوں میں 'ڈبلیو ایچ او' کے نمائندے ڈاکٹر رک پیپرکورن نے جنیوا میں صحافیوں کو بتایا ہے کہ غزہ میں بھوک کا بدترین بحران جنم لے رہا ہے۔

(جاری ہے)

غذائی تحفظ کے ماہرین خبردار کر چکے ہیں کہ غزہ میں تقریباً پانچ لاکھ لوگوں کو بھوک کا سامنا ہے اور موجودہ حالات برقرار رہنے کی صورت میں 30 ستمبر تک بہت سے علاقوں میں قحط پھیل سکتا ہے۔

بھوک کا بڑھتا بحران

ڈاکٹر پیپرکورن نے بتایا کہ انہوں نے گزشتہ دنوں شمالی غزہ کے کمال عدوان ہسپتال کا دورہ کیا جہاں 'ڈبلیو ایچ او' کی مدد سے چلائے جانے والے غذائیت کے مرکز میں روزانہ 300 سے زیادہ بچوں کا معائنہ کیا جاتا ہے۔ اس دورے میں ہسپتال نے آگاہ کیا کہ طبی معائنے کے لیے لائے جانے والے 11 فیصد سے زیادہ بچے شدید غذائی قلت کا شکار ہوتے ہیں۔

انہوں نے بتایا کہ وہ ہسپتال میں ان بچوں کو خود دیکھ چکے ہیں جن میں ایک کی عمر پانچ برس تھی لیکن وہ ڈھائی برس کا دکھائی دیتا تھا۔

'ڈبلیو ایچ او' غزہ کے 19 طبی مراکز میں غذائی قلت کے علاج میں مدد دیتا ہے تاہم، اسرائیل کی جانب سے امداد کی فراہمی روکے جانے سے ادارے کے لیے اپنا کام جاری رکھنا مشکل ہو گیا ہے۔

ڈاکٹر پیپرکورن نے خبردار کیا ہے کہ طویل مدتی غذائی قلت کے اثرات بڑھوتری رک جانے اور جسمانی معذوری کی صورت میں تاعمر برقرار رہ سکتے ہیں۔

انہوں نے بتایا ہے کہ 'ڈبلیو ایچ او' اسرائیلی حکام کے سامنے متواتر یہ معاملہ اٹھا رہا ہے۔ ادارے کے 31 امدادی ٹرک رفح کی سرحد سے چند کلومیٹر دور مصر کے علاقے العریش میں کھڑے ہیں جبکہ مغربی کنارے میں بھی امدادی سامان کی بڑی مقدار موجود ہے جسے اجازت ملتے ہیں غزہ میں بھیجا جا سکتا ہے۔

طبی مراکز کو تحفظ دینے کا مطالبہ

ڈاکٹر پیپرکورن نے بتایا کہ جنوبی غزہ کے علاقے خان یونس میں واقع نصر میڈیکل کمپلیکس کے برن یونٹ کو آج اسرائیل کی جانب سے حملے کا نشانہ بنایا گیا جس میں دو افراد ہلاک اور 12 زخمی ہو گئے۔ اس حملے کے نتیجے میں ہسپتال کے شعبہ جراحی میں 18 بستروں کو نقصان پہنچا۔

اطلاعات کے مطابق اس حملے میں ہلاک ہونے والے فلسطینیوں میں ایک صحافی تھا جو قبل ازیں کسی حملے میں زخمی ہونے کے بعد اس ہسپتال میں زیرعلاج تھا۔

ڈاکٹر پیپرکورن نے مطالبہ کیا ہےکہ طبی مراکز کو جنگی کارروائیوں سے تحفظ دیا جائے، غزہ میں امداد کی فراہمی بحال کی جائے، تمام یرغمالیوں کو فوری رہا کیا جائے اور جنگ بندی بحال کر کے مستقل امن قائم کیا جائے۔