سکائوٹس ایسوسی ایشن کے زیراہتمام آپریشن بنیان مرصوص کی کامیابی پر حاجی کیمپ ملتان میں تقریب

بدھ 14 مئی 2025 16:16

ملتان (اُردو پوائنٹ اخبارتازہ ترین - اے پی پی۔ 14 مئی2025ء) حاجی کیمپ ملتان میں آپریشن بنیان مرصوص کی کامیابی پر پاک فوج کے ساتھ اظہارتشکر منانے کے لیے سکائوٹس ہردم تیارکے عنوان سے تقریب کااہتمام کیاگیا۔تقریب میں ڈویژ نل اورضلعی ملتان کی سکائوٹس ایسوسی ایشن اورزکریااوپن گروپ کے سکائوٹس نے شرکت کی ۔چیئرمین فنانس کمیٹی سکائوٹس ایسوسی ایشن پنجاب ترس محی الدین نے خطاب کرتے ہوئے کہاکہ ہماری آرمی نے بڑے تحمل اورحوصلے کامظاہرہ کرتے ہوئے دشمن کے لیے سیسہ پلائی دیوار ثابت ہوئی ۔

ہم تمام فورسز کے جوانوں کودل کی گہرائیوں سے سیلوٹ پیش کرتے ہیں ۔انہوں نے اعلیٰ حکمت عملی سے دشمن کے دانت کھٹے کیے اوراس کے ساتھ ہی ہماری سیاسی قیادت نے بہترین سوجھ بوجھ سے کام لیتے ہوئے دوسرے ممالک سے سفارتی رابطے بحال رکھے اوران کی حمایت حاصل کی ۔

(جاری ہے)

انہوں نےکہا کہ پاکستانی عوام اپنی فوج کے ساتھ حکومت کے ساتھ کندھے سے کندھا جوڑ کرکھڑی نظر آئی ۔

انہوں نے کہاکہ ہمارے میڈیاکے ساتھیوں نے بھی ہرمحاذ پر انہیں منہ توڑ جواب دیا ۔انہوں نے کہاکہ سکائوٹس ہمیشہ ناگہانی حالات میں مدد کے لیے تیار ہوتے ہیں اورملتان کے سکائوٹس نے زلزلے اورسیلاب متاثرین کی بحالی میں بڑھ چڑھ کر حصہ لیا ۔تقریب کے آخر میں ملک کے لیے دعا کی گئی۔ تقریب میں انچارج حاجی کیمپ اشفاق ڈوگر ،ڈاکٹرماریہ ،محمد اشفاق انصاری ،زکریا اوپن گروپ کے لیڈر سمیت دیگرنے شرکت کی ۔