Live Updates

آئی سی سی انڈین کرکٹ کونسل بننے لگی، ایک اور بھارتی 'سی ای او' کیلئے مضبوط امیدوار

آئی سی سی چیئرمین کی اہم ترین پوسٹ پر بھارتی وزیر داخلہ امیت شاہ کے بیٹے جے شاہ، کرکٹ کمیٹی کے چیئرمین سارو گنگولی قابض ہیں

ذیشان مہتاب جمعرات 15 مئی 2025 10:34

آئی سی سی انڈین کرکٹ کونسل بننے لگی، ایک اور بھارتی 'سی ای او' کیلئے ..

دبئی (اردو پوائنٹ تازہ ترین اخبار ۔ 15 مئی 2025ء ) انٹرنیشنل کرکٹ کونسل (آئی سی سی) میں بھارت کی اجارہ داری مضبوط ہونے لگی۔

میڈیا رپورٹس کے مطابق آئی سی سی میں چیئرمین جے شاہ کے منتخب ہونے کے بعد بھارتی لابی متحرک ہے اور چیف ایگزیکٹیو (سی ای او) کیلئے ایک اور بھارتی سنجوگ گپتا عہدے کیلئے مضبوط دعویدار بن گئے۔

اس سے قبل آئی سی سی کے اہم عہدوں پر بھارتی قابض ہیں، جن میں چیئرمین کی اہم ترین پوسٹ پر بھارتی وزیر داخلہ امیت شاہ کے بیٹے جے شاہ، کرکٹ کمیٹی کے چیئرمین سارو گنگولی ہیں، اس کے علاوہ دیگر اہم عہدے بھی بھارتیوں کے پاس ہیں۔

موجودہ چیف ایگزیکٹیو جیف ایلرڈائس پوزیشن سے مستعفی ہوچکے ہیں، وہ جولائی میں شیڈول آئی سی سی کے سالانہ عام اجلاس تک نوٹس پیریڈ پر ہیں۔

(جاری ہے)

دوسری جانب سی ای او کیلئے مضبوط امیدوار سنجوگ گُپتا کو بھارت کے براڈکاسٹ کنگ کے طور جانا جاتا ہے۔

آئی سی سی کے اگلے چیف ایگزیکٹیو کو اہم چیلنجوں کا سامنا ہے جس میں سب سے اہم اس فیس پر جاری مذاکرات ہیں جو جیوسٹار (سابقہ ڈزنی سٹار) نے عالمی ایونٹس کے لیے ادا کرنے پر رضامندی ظاہر کی تھی۔

اگر ہندوستان اور پاکستان حالیہ کشیدگی کے بعد ایک دوسرے سے کھیلنا بند کر دیتے ہیں تو اس معاہدے کی قدر مزید متاثر ہوگی۔