Live Updates

بھارت میں شاہینوں کے آپریشن پر فلم کا مطالبہ، ایئر وائس مارشل کے کردار کیلئے نام سامنے آگئے

جمعرات 15 مئی 2025 13:00

لاہور(اُردو پوائنٹ اخبارتازہ ترین - این این آئی۔ 15 مئی2025ء)پاکستان فلم انڈسٹری کے مشہور ڈائریکٹر نبیل قریشی سے مداحوں نے بھارت کے خلاف پاک فوج کی جانب سے کئے گئے کامیاب آپریشن بنیان مرصوص پر فلم بنانے کی اپیل کر دی۔سوشل میڈیا پر ان دنوں بھارتی جارحیت اور مودی حکومت کے جنگی جنون کے خاتمے کیلئے پاکستانی فوج کی جانب سے شروع کئے گئے آپریشن بنیان مرصوص کے چرچے ہیں، حتی کہ اب سوشل میڈیا صارفین کی جانب سے ڈائریکٹر نبیل قریشی سے اس آپریشن پر فلم بنانے اور ائیر وائس مارشل اورنگزیب احمد کے کردار کو مرکزی حیثیت دیے جانے کا مطالبہ بھی سامنے آگیا ہے۔

نبیل قریشی سے ایکس پر ایک صارف کی جانب سے آپریشن بنیان مرصوص کے حقیقی واقعات پر مبنی فلم بنانے کا مطالبہ کیا گیا، ٹوئٹ میں تجویز دی گئی کہ پاکستانی اداکار فواد خان کو ایئر وائس مارشل اورنگزیب احمد کا کردار دیا جائے کیونکہ دونوں میں کافی مشابہت ہے۔

(جاری ہے)

اس ٹوئٹ کا سکرین شاٹ شیئر کرتے ہوئے نبیل قریشی نے بھی فلم بنانے کے ارادے کا اظہار کیا اور اسے اپنے لیے اعزاز قرار دیا، بعد ازاں ایک صارف نے نبیل قریشی کو مشورہ دیا کہ چونکہ فوادخان بھارتی انڈسٹری کا حصہ رہ چکے ہیں لہذا وہ ائیر مارشل اورنگزیب احمد کے کردار کیلئے صحیح انتخاب نہیں، اس کے برعکس پاکستان انڈسٹری سے مخلص اداکاروں کو اس فلم کا حصہ بنایا جائے۔

سوشل میڈیا پر جاری بحث کے دوران مختلف سوشل میڈیا اکانٹس کی جانب سے مختلف اداکاروں کی تصاویر شیئر کرتے ہوئے مداحوں سے ائیر مارشل اورنگزیب احمد کے کردار کیلئے رائے بھی طلب کی جا رہی ہے، شیئر کی گئی تصاویر میں ہمایوں سعید، وہاج، فہد مصطفی اور حمزہ عباسی جیسی شخصیات کو شامل کیا گیا ہے۔