چیف سیکریٹری سندھ اور چیئرمین ون مین کمیشن کا اقلیتوں کے حقوق اور فلاح سے متعلق اہم اجلاس

کراچی(اُردو پوائنٹ اخبارتازہ ترین - این این آئی۔ 15 مئی2025ء)چیف سیکریٹری سندھ آصف حیدر شاہ اور سپریم کورٹ کے احکامات کی روشنی میں قائم کیے گئے ون مین کمیشن برائے اقلیتوں کے حقوق کے چیئرمین ڈاکٹر شعیب سڈل کی زیر صدارت سندھ سیکریٹریٹ میں ایک اہم اجلاس منعقد ہوا، جس میں اقلیتوں کے حقوق کے تحفظ، ان کی جائیدادوں اور مذہبی مقامات کی حفاظت اور سماجی و معاشی فلاح سے متعلق مختلف امور پر تفصیلی غور کیا گیا۔

اجلاس میں کمشنر کراچی حسن نقوی، سینئر ممبر بورڈ آف ریونیو بقا اللہ انڑ، سیکریٹری بلدیات وسیم شمشاد، سیکریٹری امپلیمنٹیشن اینڈ کوآرڈینیشن عابد سلیم قریشی، سیکریٹری لینڈ یوٹلائزیشن، سیکریٹری مذہبی امور، متروکہ وقف املاک بورڈ کے افسران اور سندھ حکومت کے دیگر سینئر افسران نے شرکت کی۔

(جاری ہے)

اجلاس میں چیف سیکریٹری سندھ آصف حیدر شاہ نے کہا کہ سندھ حکومت اقلیتوں کی سماجی و معاشی ترقی کے لیے سنجیدہ اقدامات کر رہی ہے۔

انہوں نے اس بات پر زور دیا کہ سرکاری ملازمتوں میں اقلیتوں کے لیے مختص کوٹہ پر مکمل عملدرآمد یقینی بنایا جارہا ہے، تاکہ اقلیتی برادری کو ترقی کے یکساں مواقع میسر آ سکیں۔ اجلاس میں بتایا گیا کہ سندھ حکومت کی جانب سے صوبے بھر میں اقلیتوں کے 253 مذہبی مقامات پر سی سی ٹی وی کیمرے نصب کیے گئے ہیں تاکہ ان کی حفاظت کو یقینی بنایا جا سکے اور کسی بھی ناخوشگوار واقعے سے بچا جا سکے۔

اجلاس میں اقلیتوں کی جائیدادوں اور مذہبی مقامات پر غیر قانونی قبضے اور تجاوزات کے خاتمے سے متعلق احکامات پر عملدرآمد کا بھی تفصیل سے جائزہ لیا گیا۔ چیف سیکریٹری نے ہدایت دی کہ متعلقہ ادارے فوری طور پر کارروائی کرتے ہوئے اقلیتوں کے حقوق کا تحفظ یقینی بنائیں۔ اجلاس میں ایک اہم فیصلہ کیا گیا کہ سیکریٹری امپلیمنٹیشن اینڈ کوآرڈینیشن کے تحت ایک خصوصی سیل قائم کیا جائے گا، جو اقلیتوں سے متعلق مسائل پر تمام متعلقہ محکموں اور ڈپٹی کمشنرز کی کارکردگی کی نگرانی کرے گا۔

یہ سیل اقلیتوں کی شکایات کے فوری حل اور حکومتی احکامات پر عملدرآمد کو یقینی بنانے کے لیے ایک مثر رابطہ اور جائزہ نظام کا کردار ادا کرے گا۔ چیف سیکریٹری سندھ نے مزید ہدایت دی کہ تمام محکمے یہ یقینی بنائیں کہ حکومت کے ساتھ کام کرنے والی نجی کمپنیاں سرکاری طور پر طے شدہ کم از کم اجرت پر عمل کریں۔ انہوں نے کہا کہ اس ضمن میں کسی قسم کی کوتاہی برداشت نہیں کی جائے گی۔

چیف سیکریٹری نے ایڈیشنل چیف سیکریٹری لوکل گورنمنٹ کو ہدایت دی کہ نالوں اور مین ہولز کی صفائی جیسے خطرناک کاموں میں مصروف عملے کو مکمل سیفٹی کٹس فراہم کی جائیں تاکہ ان کی جان اور صحت کا تحفظ کیا جا سکے۔ اجلاس کے دوران چیف سیکریٹری سندھ آصف حیدر شاہ نے تمام ڈپٹی کمشنرز کو ہدایت دی کہ وہ ہر ماہ اقلیتی برادری کے نمائندہ وفود کے ساتھ اجلاس منعقد کریں، ان کے مسائل سنیں اور ان کا فوری ازالہ یقینی بنائیں۔

اس موقع پر ڈاکٹر شعیب سڈل نے سندھ حکومت کی کاوشوں کو سراہتے ہوئے کہا کہ صوبہ سندھ میں بین المذاہب ہم آہنگی، اقلیتوں کے تحفظ اور فلاح پر خصوصی توجہ دی جا رہی ہے۔ انہوں نے کہا کہ سپریم کورٹ کے حکم کے تحت جنوری 2019 میں ون مین کمیشن قائم کیا گیا تھا تاکہ ملک بھر میں اقلیتوں کے حقوق پر عملدرآمد کی نگرانی کی جا سکے۔اجلاس کے آغاز میں آئی جی سندھ غلام نبی میمن کی والدہ کے انتقال پر فاتحہ خوانی اور دعا کی گئی۔ چیف سیکریٹری سندھ آصف حیدر شاہ نے آئی جی سندھ سے ان کی والدہ کے انتقال پر دلی تعزیت کا اظہار کیا اور مرحومہ کے درجات کی بلندی کے لیے دعا کی۔