چیئرمین واپڈا کا داسو ہائیڈروپاور پراجیکٹ کا دورہ،جاری تعمیراتی کاموں کا جائزہ لیا

لاہور (اُردو پوائنٹ اخبارتازہ ترین - اے پی پی۔ 16 مئی2025ء) چیئرمین واپڈا انجینئر لیفٹیننٹ جنرل سجاد غنی(ریٹائرڈ) نے خیبرپختونخوا کے ضلع اپر کوہستان میں دریائے سندھ پر زیرتعمیر داسو ہائیڈروپاور پراجیکٹ کا دورہ کیا اورپراجیکٹ کی اہم سائٹس پر جاری تعمیراتی پیش رفت کا جائزہ لیا۔ ترجمان کے مطابق ان سائٹس میں ریور ڈائی ورشن سسٹم، مین ڈیم، پاور ہائوس اور متبادل شاہراہ قراقرم شامل ہیں۔

اس موقع پرجنرل منیجر/ پراجیکٹ ڈائریکٹرداسو ہائیڈرو پاور پراجیکٹ، کنسلٹنٹس اور کنٹریکٹرز نے چیئرمین کومختلف سائٹس پراہداف اور اب تک ہونے والی پیش رفت کے حوالے سے بریفنگ دی۔ بریفنگ کے دوران بتایا گیا کہ پراجیکٹ کی 20 سائیٹس پر تعمیراتی کام تیزی سے جاری ہے، فروری 2023 میں دریائے سندھ کا رخ موڑے جانے کے علاوہ حال ہی میں پراجیکٹ پر دیگر کئی اہم اہداف بھی مکمل کیے جا چکے ہیں جبکہ مین ڈیم کے دائیں اور بائیں کناروں((Abutmentsکی کھدائی مکمل ہو چکی ہے۔

(جاری ہے)

اسی طرح ہائی فلو سیزن کے دوران اضافی پانی کو گزارنے کے لیے دائیں کنارے توسیعی بائی پاس ٹنل اور اوپن چینل بھی مکمل کی جا چکی ہیں جبکہ اپ سٹریم اور ڈائون سٹریم کوفر(عارضی) ڈیمز مکمل ہونے کے بعد مین ڈیم کی فائونڈیشن پر کھدائی کی جارہی ہے جو رواں سال اگست میں مکمل ہو جائے گی، مین ڈیم کیلئے رولر کمپیکٹ کنکریٹ(آر سی سی) ڈالنے کا عمل بھی رواں سال دسمبر میں شروع ہو جائیگا۔

بریفنگ کے دوران مزید بتایا گیا کہ پاور ہائوس کی کھدائی کا کام جنوری 2026 میں مکمل ہوگا جبکہ شاہراہ قراقرم یکم فروری 2026 میں مکمل ہوگی، شاہراہ قراقرم-1 25کلومیٹرطویل اوراس میں سات ٹنلز و تین پل بھی شامل ہیں ، داسو ہائیڈرو پاور پراجیکٹ سے بجلی کی پیداوار 2027 میں شروع ہوگی۔اس موقع پر گفتگو کرتے ہوئے چیئرمین واپڈا نے کنسلٹنٹس اور کنٹریکٹرز کو ہدایت کی کہ وہ ٹائم لائنز کے مطابق پراجیکٹ کی تکمیل کے لیے اپنی کوششوں میں تیزی لائیں۔

ترجمان کے مطابق دورے کے دوسرے مرحلے میں چیئرمین واپڈا نے مقامی عمائدین کے ساتھ ایک جرگہ میں شرکت کی، جرگہ میں از خود آباد کاری پیکج کے تحت ادائیگیوں اور لوکل ایریا ڈویلپمنٹ سکیم پر عمل درآمد بارے تفصیلی بات چیت کی گئی۔ چیئرمین نے کہا کہ واپڈا پراجیکٹ ایریا سے تعلق رکھنے والے لوگوں کی سماجی اوراقتصادی ترقی کے لئے پر عزم اور اس مقصد کے لیے پراجیکٹ ایریا میں مختلف ترقیاتی سکیموں پر خطیر رقم خرچ کی جا رہی ہے، ان ترقیاتی سکیموں میں مقامی افراد کی آباد کاری، ماحو لیاتی انتظام اور علاقے کی معاشرتی ترقی کے منصوبے شامل ہیں۔

چیئرمین نے پراجیکٹ حکام کو ہدایت کی کہ مقامی افراد کے مسائل کے حل کے لئے ان کے ساتھ قریبی رابطہ برقرار رکھیں۔ترجمان کے مطابق داسو ہائیڈرو پاور پراجیکٹ کی مجموعی پیداواری صلاحیت 4 ہزار 320 میگا واٹ اور اسے دو مراحل میں مکمل کیا جا رہا ہے۔ اس وقت واپڈا پراجیکٹ کے پہلے مرحلے پر کام کر رہا ہے جس کی پیداواری صلاحیت2 ہزار 160 میگا واٹ ہے، اس سے نیشنل گرڈ کو سالانہ 12 ارب یونٹ کم لاگت اور ماحول دوست پن بجلی فراہم ہوگی۔