Live Updates

دھرم شالہ کا خوف نہ نکل سکا، مچل سٹارک کا بھارت جانے سے انکار

آسٹریلین فاسٹ باولر نے آئی پی ایل فرنچائز اپنے فیصلے سے متعلق آگاہ کردیا

ذیشان مہتاب جمعہ 16 مئی 2025 11:41

دھرم شالہ کا خوف نہ نکل سکا، مچل سٹارک کا بھارت جانے سے انکار

سڈنی (اردو پوائنٹ تازہ ترین اخبار ۔ 16 مئی 2025ء ) انڈین پریمئیر لیگ (آئی پی ایل) میں دہلی کیپیٹلز کی نمائندگی کرنیوالے مچل اسٹارک نے ٹورنامنٹ کے بقیہ میچز کیلئے بھارت جانے سے انکار کردیا۔

میڈیا رپورٹس کے مطابق آسٹریلیا کے فاسٹ بولر مچل اسٹارک نے سیکیورٹی خدشات کے باعث بھارت میں آئی پی ایل کے بقیہ میچز کھیلنے سے دوٹوک الفاظ میں انکار کرتے ہوئے اپنے فیصلے سے متعلق فرنچائز کو بھی آگاہ کردیا ہے۔

مچل سٹارک نے فرنچائز کو بقیہ میچز سے اپنی عدم دستیابی کے حوالے سے بتایا، دہلی کیپیٹلز نے فاسٹ بولر کے متبادل کیلئے دیگر کھلاڑیوں سے رابطے تیز کردیے ہیں۔

خیال رہے کہ مچل اسٹارک دھرم شالا میں بلیک آؤٹ کی وجہ سے روکے جانے والے میچ کا بھی حصہ تھے جہاں ان کی اہلیہ اور ویمن کرکٹر ایلیسا ہیلی بھی وہاں موجود تھیں۔

(جاری ہے)

گزشتہ دنوں ایلیسا ہیلی نے دھرم شالا کے حالات پر انٹرویو دیتے ہوئے بتایا تھا کہ اطلاعات کے فقدان کی وجہ سے گراؤنڈ میں کھلاڑی خوف کا شکار تھے، ساری صورتِ حال میں سب سے زیادہ ڈرانے والی چیز غلط معلومات تھیں، جنہوں نے ہمیں ڈرا دیا تھا۔

ان کا کہنا تھا کہ مجھے لگتا ہے کہ بھارت میں آئی پی ایل میچز کیلئے آسٹریلوی کرکٹرز کو اب حکومت سے سکیورٹی کی یقین دہانی لینی چاہیے۔

واضح رہے کہ آئی پی ایل کو گزشتہ جمعے پاک بھارت کشیدگی کے باعث ایک ہفتے کیلئے ملتوی کردیا گیا تھا تاہم جنگ بندی اعلان کے بعد ٹورنامنٹ 17 مئی سے دوبارہ شروع ہوگا۔