قومی اہداف کا حصول منظم تنظیم ہی کے ذریعے ممکن ہے ،پشتونخواملی عوامی پارٹی

جمعہ 16 مئی 2025 22:38

کوئٹہ (اُردو پوائنٹ اخبارتازہ ترین - آن لائن۔ 16 مئی2025ء) پشتونخواملی عوامی پارٹی کے رہنمائوں نے کہا ہے کہ قومی اہداف کا حصول منظم تنظیم ہی کے ذریعے ممکن ہے ، پارٹی کے ہر سطح پر تنظیمی ڈھانچے کو مضبوط وفعال بنانے کے لیے کارکنوں نے محنت کرنی ہوں گی ، سوشل میڈیا کا درست استعمال ضروری ہے ، پارٹی کے پروگرام کو ہر گھر تک بآسانی پہنچایا جاسکتا ہے ، پارٹی کارکن سوشل میڈیا پر غیر ضروری طور پر اپنی توانائی اور وقت ضائع کرنے کی بجائے اپنے حقیقی جدوجہد پرتوجہ مرکوز کریں ، کوئٹہ شہر مسائلستان بن چکا ہے ، کسی بھی شعبے میں عوام کو سہولیات میسر نہیں ، گیس ، بجلی ، پینے کے صاف پانی ، تعلیم ،صحت اور بالخصوص روزگار سے محروم رکھا گیا ہے ۔

کوئٹہ شہر پر فارم47کے نمائندوں کو مسلط کرکے ہر طرف لوٹ کھسوٹ ،کرپشن ، کمیشن ، اقرباء پروری ، میرٹ کی پائمالی اور بالخصوص پشتون عوام کے حقوق کی سودا گری کے لیے انہیں اسمبلی میں بٹھایا گیا تاکہ وہ چُپ کا روزہ رکھ سکے اور یہاںپشتون عوام کو دیوار سے لگایا جاسکے۔

(جاری ہے)

کامیاب علاقائی کانفرنس پر تمام کارکنوں اور منتخب ایگزیکٹیوز کو مبارکباد پیش کرتے ہیں ۔

ان خیالات کا اظہار پشتونخواملی عوامی پارٹی کے صوبائی صدر عبدالقہار خان ودان ، صوبائی سینئر نائب صدر وضلع کوئٹہ کے سیکرٹری سید شراف آغا، صوبائی جنرل سیکرٹری کبیر افغان ودیگر ضلعی وتحصیل رہنمائوں نے خطاب کیا ۔ ضلع کوئٹہ تحصیل سٹی سے مربوط افغان مینہ علاقائی کانفرنس (انتخابات) حاجی محمود آکا کی رہائش گاہ پر منعقدہوا۔ اس موقع پر 7رکنی نئے ایگزیکٹیوز کا انتخاب عمل میں لایا گیا جس کے مطابق علاقائی سیکرٹری تور جان عسکر ، سینئر معاون سیکرٹری حاجی فضل الرحمن اچکزئی، مناف خان ، سرور خان کاکوزئی ، سلام آزاد، اختر محمد اور رحیم اللہ معاونین منتخب ہوئے ۔

نومنتخب ایگزیکٹیوز سے صوبائی صدر عبدالقہار خان ودان نے حلف لیا۔ کانفرنس میں پارٹی کے ضلع کوئٹہ اور تحصیل سٹی کے ایگزیکٹیوز اراکین نے بھی شرکت کی ۔