بنیان مرصوص پر مسلح افواج کی ستائش جاری، نیویارک ٹائمز نے پاکستان کی بڑی کامیابی قرار دیدی

نیویارک ( اُردو پوائنٹ اخبارتازہ ترین۔ 17 مئی2025ء ) آپریشن بنیان مرصوص پر مسلح افواج کی ستائش کا سلسلہ جاری ہے نیویارک ٹائمز نے بھی اس کو پاکستان کی بڑی کامیابی قرار دیدیا۔ تفصیلات کے مطابق دنیا بھر کے دیگر میڈیا پلیٹ فارمز کی طرح نیویارک ٹائمز نے بھی آپریشن ’بنیان مرصوص‘ کو پاکستانی مسلح افواج کی کامیابی قرار دیا ہے، اس حوالے سے نیویارک ٹائمز میں شائع ایک مضمون میں کہا گیا ہے کہ پاکستان طویل عرصے سے سیاسی، اقتصادی اور سلامتی کے بحرانوں میں گھرا ہوا تھا، بھارت کی جارحیت کے خلاف آپریشن ’بنیان مرصوص‘ میں بڑی فتح نے یکا یک سب کچھ بدل کر رکھ دیا۔

نیویارک ٹائمز کا کہنا ہے کہ بھارت کے ساتھ بڑی فوجی جھڑپ میں پاکستان کی کامیابی سے پاکستانی مسلح افواج کے وقار میں مزید اضافہ ہوا، پاکستانی مسلح افواج کی جیت پر ان کے حق میں ریلیاں بھی نکالیں گئیں، پاکستان اور بھارت کے درمیان حالیہ تنازع نے عوامی جذبات میں تبدیلی کی لہر پیدا کی ہے، اس حوالے سے پاکستانی شہری کہتے ہیں کہ ایسا محسوس ہوتا ہے ہم نے کچھ جیت لیا ہے اب ہم ناکام ریاست نہیں ہیں، تمام منفی پروپیگنڈے کے باوجود پاکستان کی مسلح افواج نے اپنی طاقت اور اثر و رسوخ کو مزید مستحکم کیا ہے۔

(جاری ہے)

نیویارک ٹائمز نے لکھا کہ بھارت نے پہلگام فالس فلیگ آپریشن کا الزام پاکستان پر عائد کرکے جارحیت کا آغاز کیا، پاک فضائیہ نے آپریشن ’بنیان مرصو ص‘ میں بھارتی لڑاکا طیاروں کو زمین بوس کرکے سب کو حیران کیا، پاکستان کی مسلح افواج کی جانب سے منہ توڑ جواب اور بڑی جنگ سے بچنے کے لیے پاکستان نے بھارتی سیز فائر کی پیشکش کو قبول کیا، آپریشن بنیان مرصوص کی کامیابی مسلح افواج بالخصوص جنرل سید عاصم منیر کی قیادت پر اعتماد کو بحال کرتی ہے، بھارتی جارحیت کے منہ توڑ جواب کے بعد جنرل سید عاصم منیر قومی نجات دہندہ کے طور پر ابھرے، اس قسم کی فتوحات فوج کی پیشہ ورانہ طاقت کو سیاسی اثر و رسوخ سے زیادہ تقویت دیتی ہیں۔

دفاعی ماہرین کا کہنا ہے کہ نیویارک ٹائمز کا مضمون اس بات کا ثبوت ہے کہ پاکستان کی مسلح افواج نے پیشہ ورانہ انداز سے بھارتی جارحیت کا منہ توڑ جواب دیا، نیویارک ٹائمز کے اس مضمون سے یہ بھی ثابت ہوتا ہے کہ پاکستانی مسلح افواج نے جو کچھ کیا وہ اپنے دفاع کے طور پر کیا، نیویارک ٹائمز کے مطابق آپریشن ’بنیان مرصوص‘ کی کامیابی کا سہرا اعلیٰ عسکری قیادت کے سر ہے۔