اپوزیشن میں ہوتے ہو تو "ووٹ کو عزت دو", حکومت میں آکر کہتے ہو میں بھول گیا

جن لوگوں کو نالے صاف کرنے نہیں آتے انہیں حکومت کرنا کیا آتی ہو گی؟ مفتاح اسماعیل نے حکمرانوں کو کھری کھری سنا دیں

محمد علی ہفتہ 2 اگست 2025 21:12

راولپنڈی(اُردو پوائنٹ اخبارتازہ ترین۔ 02 اگست2025ء) مفتاح اسماعیل کا کہنا ہے کہ اپوزیشن میں ہوتے ہو تو "ووٹ کو عزت دو", حکومت میں آکر کہتے ہو میں بھول گیا، جن لوگوں کو نالے صاف کرنے نہیں آتے انہیں حکومت کرنا کیا آتی ہو گی؟۔ تفصیلات کے مطابق عوام پاکستان پارٹی کے سیکرٹری جنرل مفتاح اسماعیل نے کہاہے کہ جو 244ارب روپے آپ نے چوری کیے وہ توعوام کو واپس کریں،تینوں بڑی پارٹیوں کو دیکھ لیا لیکن بہتری اور ترقی نہیں دیکھی۔

عوام پاکستان پارٹی کے ورکرز کنونشن سے خطاب کرتے ہوئے انہوں نے کہا کہ بھارت سے تعلیم، معیشت، صحت، روزگار کی جنگ جیتنا بھی ضروری ہے۔مفتاح اسماعیل نے کہا کہ جہالت، بے روزگاری اور معیشت کیلیے جہاد کرنا ہو گا تبھی پاکستان آگے بڑھے گا، کیا 78 سال میں ہم نے عوام کو بھوک، غربت، بے روزگاری سے آزادی دی ۔

(جاری ہے)

انہوں نے کہاکہ گزشتہ 6سال میں ملک کی تینوں بڑی جماعتوں نے ملک پر حکومت کی، ہم نے تینوں بڑی پارٹیوں کو دیکھ لیا لیکن بہتری اور ترقی نہیں دیکھی۔

عوام پاکستان پارٹی کے سیکرٹری جنرل نے کہا کہ پی پی کے پاس 2صوبے، ن لیگ کے پاس بڑا صوبہ اور پی ٹی آئی کے پاس 1صوبہ ہے، جن لوگوں کو نالے صاف کرنے نہیں آتے انہیں حکومت کرنا کیا آتی ہو گی۔انہوں نے کہا کہ کبھی لوگ ووٹ کو عزت دیتے ہیں، کبھی نہیں دیتے، دنیا میں سب سے زیادہ سکولوں سے باہر بچے صرف پاکستان میں ہیں، 1990 سے پاکستان بنگلا دیش اور بھارت کے مقابلے میں پیچھے جا رہا ہے۔

مفتاح اسماعیل نے کہاکہ پاکستان میں 40 فیصد لوگ خطِ غربت سے نیچے ہیں، ہم یہ نہیں کہتے کہ یہ چینی چور ہیں، یہ تو کہہ سکتے ہیں کہ مہنگی کرنے والے ہیں، لوگ کہتے ہیں ہم 140روپے کی چینی نہیں خرید سکتے تھے 200 روپے کلو کی کس طرح خریدیں گے۔انہوں نے کہاکہ بنگلا دیش میں بجلی 25روپے کی اور یہاں 45روپے کی کیوں ہی زیور بیچ کر بل بھرنا، بچوں کی اسکول کی فیس نہ بھر پانا، یہ بے رحمی کی انتہا نہیں پاکستان میں راج قانون اور آئین کا ہونا چاہیے، کسی فرد کا نہیں ہونا چاہیے۔