Live Updates

پاکستان میں جو دہشتگردی نظر آتی ہے اس کے پیچھے بھارت ہے

اب ہم نے اکٹھے ہوکر اس آہنی دیوار کو دہشتگردی کی طرف موڑنا ہے، یقین جانیئے جب فوج اور عوام اکٹھے ہوں گے تو ملک میں کوئی دہشتگرد نہیں بچے گا۔ ترجمان پاک فوج لیفٹیننٹ جنرل احمد شریف چوہدری کا خطاب

ثنااللہ ناگرہ ہفتہ 17 مئی 2025 20:13

پاکستان میں جو دہشتگردی نظر آتی ہے اس کے پیچھے بھارت ہے

اسلام آباد ( اردوپوائنٹ اخبار تازہ ترین۔ آئی پی اے ۔ 17 مئی 2025ء ) ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ پاکستان میں جو دہشتگردی ہے اس کے پیچھے بھارت ہے، اب ہم سب نے اکٹھا ہوکر اس آہنی دیوار کو دہشتگردی کی طرف موڑنا ہے، یقین جانیئے جب فوج اور عوام اکٹھے ہوں گے تو ملک میں کوئی دہشتگرد نہیں بچے گا۔ تفصیلات کے مطابق ڈی جی آئی ایس پی آر لیفٹیننٹ جنرل احمد شریف چوہدری نے اسلام آباد میں طلباء اور اساتذہ کے ساتھ خصوصی نشست کی۔

ڈی جی آئی ایس پی آرنے نوجوانوں کی ملک کیلئے کاوشوں کو نہایت اہم قرار دیا۔ ڈی جی آئی ایس پی آر نے طلباء کو دشمن کے ناپاک عزائم سے آگاہ کیا اور متحد رہنے کی تلقین کی۔ ڈی جی آئی ایس پی آر لیفٹیننٹ جنرل احمد شریف چوہدری نے کہا کہ پاکستان امن کا گہوارہ ہے، پاکستان کی فتح دراصل امن کی فتح ہے۔

(جاری ہے)

ڈی جی آئی ایس پی آر نے پاک فوج کی جانب سے پورے ملک کے اساتذہ کو سلام پیش کیا۔

پاکستان اور پاکستانی فوج کیلئے عوام نے والہانہ محبت کا اظہار کیا۔ آپ کی والہانہ محبت دیکھ کر کہہ سکتا ہوں کہ پاکستان کا مستقبل روشن اور محفوظ ہے۔ ترجمان پاک فوج نے کہا کہ آپ لوگ کہتے تھے کہ یہ اپنا کام نہیں کرتے؟ آج ان لوگوں سے سوال کریں کہ فوج نے اپنا کام کیا ہے یا نہیں؟ کیا آج آپ ان کو ذمہ دار نہیں ٹھہرائیں گے؟ کیا آپ ان کا احتساب نہیں کرو گے؟ کہ تم کون ہوتے ہو اپنی فوج اور افسران کے خلاف باتیں کرتے تھے؟ انہوں نے کہا کہ پاکستان میں جو دہشتگردی نظر آتی ہے اس کے پیچھے بھارت ہے، اب آہنی دیوار ( آپریشن بنیان مرصوص) کو دہشتگردی کے خاتمے کی طرف موڑنا ہے۔جب فوج اور عوام اکٹھے ہوں گے تو یقین جانیئے اس ملک میں کوئی دہشتگرد نہیں بچے گا۔