Live Updates

بھارتی میڈیا نے جھوٹی خبریں، جعلی ویڈیوز دکھا کر سچ کا گلا گھونٹ دیا،نیویارک ٹائمز

اتوار 18 مئی 2025 16:30

نیویارک (اُردو پوائنٹ اخبارتازہ ترین - اے پی پی۔ 18 مئی2025ء) نامور امریکی اخبار” نیویارک ٹائمز“ نے بھارتی میڈیا کے جھوٹے پروپیگنڈے کو بے نقاب کرتے ہوئے کہا ہے کہ پاک بھارت کشیدگی کے دوران بھارتی میڈیا نے جان بوجھ کر جھوٹی خبریں پھیلائیں اور مصنوعی ذہانت کے ذریعے ویڈیوز میں رد و بدل کر کے عوام کو گمراہ کیا۔کشمیرمیڈیاسروس کے مطابق نیویارک ٹائمز نے ایک رپورٹ میں کہاکہ بھارتی میڈیا نے یہ دعویٰ کیا کہ بھارتی افواج نے پاکستان کی جوہری تنصیبات کو نشانہ بنایا، کراچی بندرگاہ کو تباہ کیا اور پاکستانی فضائیہ کے دو جنگی طیارے مار گرائے تاہم ان میں سے کسی بھی دعوے کی نہ تو آزادذرائع سے تصدیق ہو سکی اور نہ ہی کوئی ثبوت پیش کیا گیا۔

اخبار نے کہا کہ معروف بھارتی ٹی وی چینلز نے بھی ان جھوٹے بیانیوں کو بڑھا چڑھا کر پیش کیا جبکہ فیکٹ چیکنگ ویب سائٹ ”Alt News“نے ثابت کیا کہ کئی ویڈیوز، نقشے اور دعوے سراسر جھوٹ پر مبنی تھے۔

(جاری ہے)

نیویارک ٹائمز نے لکھا کہ بھارتی اینکرز اور مبصرین نے جنگی جذبات کو ہوا دینے میں خطرناک کردار ادا کیا اور ایک ایٹمی خطے میں غیر ضروری اشتعال پیدا کیا۔

رپورٹ میں کہا گیا کہ بھارتی میڈیا کی یہ روش نہ صرف پیشہ وارانہ صحافت کی خلاف ورزی ہے بلکہ علاقائی امن و سلامتی کے لیے بھی خطرناک ہے۔دفاعی ماہرین نے خبردار کیا ہے کہ جھوٹی خبروں کا یہ سیلاب بھارت کی بین الاقوامی ساکھ کو ناقابل تلافی نقصان پہنچا رہا ہے اور اس سے نیوکلیئر اسکیلیشن جیسا سنگین خطرہ بھی پیدا ہو سکتا ہے۔سیاسی ماہرین کے مطابق مودی حکومت کے اقتدار میں آنے کے بعد بھارت میں آزاد صحافت دبا ﺅکا شکار ہے اور حکومت کی جانب سے غیر ملکی صحافتی اداروں پر بھی دبا ﺅبڑھتا جا رہا ہے جس پر بین الاقوامی سطح پر تنقید میں اضافہ ہو رہا ہے۔