Live Updates

شاہد آفریدی کی لائن آف کنٹرول پر کھڑے ہو کر پراٹھے کھانے کی ویڈیو وائرل

سابق کپتان کا عوام اور پاک فوج سے اظہار یکجہتی کیلئے لائن آف کنٹرول کا دورہ، متاثرین معرکہ حق میں امدادی چیک بھی تقسیم کیے

ذیشان مہتاب پیر 19 مئی 2025 11:50

شاہد آفریدی کی لائن آف کنٹرول پر کھڑے ہو کر پراٹھے کھانے کی ویڈیو ..

مظفر آباد (اردو پوائنٹ تازہ ترین اخبار ۔ 19 مئی 2025ء ) قومی کرکٹ ٹیم کے سابق کپتان شاہد آفریدی حالیہ پاک بھارت کشیدگی کے بعد سے پاک فوج کی حمایت میں کھل کر اظہار کر رہے ہیں جس کے باعث بھارتی عوام انہیں شدید تنقید کا نشانہ بنا رہی ہے ۔

گزشتہ روز جب ایک تقریب میں آرمی چیف جنرل عاصم منیر اور شاہد آفریدی کی گرمجوشی سے ملنے کی ویڈیو سامنے آئی تو پاکستانی عوام خوشگوار حیرت میں مبتلا ہو گئی جس انداز میں شاہد آفریدی نے آرمی چیف کا بوسہ لیا ، یہ دیکھ کر تمام پاکستانیوں نے ویڈیو کو خوب انجوائے کیا جبکہ بھارتی عوام غصے میں آپے سے باہر ہو گئی۔

اب ان کی ایک نئی ویڈیو سامنے آئی ہے جس میں وہ لائن آف کنٹرول کے لیپہ سیکٹر میں کھڑے ہو کر پراٹھے کھا رہے ہیں ۔

(جاری ہے)

یہ ویڈیو دیکھ کر پاکستانی عوام شاہد آفریدی کی حب الوطنی اور پاک فوج سے محبت کو سلام کر رہی ہے ۔

واضح رہے کہ شاہد آفریدی عوام اور پاک فوج سے اظہار یکجہتی کے لیے لائن آف کنٹرول پہنچے تھے۔

شاہد آفریدی کا وادی لیپہ میں شاندار استقبال کیا گیا، سابق کپتان نے یاد گار شہداء پر بھی حاضری دی۔ انہوں نے لیپہ کرکٹ گراؤنڈ میں نوجوانوں سے ملاقات کی اور دستخط شدہ بیٹ بال بھی تقسیم کیے۔

شاہد آفریدی کا میڈیا سے گفتگو میں کہنا تھا کہ کراچی سے پاکستانی عوام اوراپنی فیملی کی جانب سے لیپہ کے لوگوں کا شکریہ ادا کرنے آیا ہوں، اگر انڈیا نے دوبارہ سے جارحیت کی کوشش کی تو اسی طرح بھرپورجواب دیا جائے گا۔

شاہد آفریدی نے متاثرین معرکہ حق سے بھی ملاقات کی اور ان میں امدادی چیک تقسیم کیے، وادی لیپہ کی لوگوں کے جانب سے شاہدآفریدی کو اخروٹ کی لکڑی کا بنا ہوا شاہین تحفے میں دیا گیا۔