یوکرین میں پیش رفت صرف امریکی و روسی صدور کی ملاقات سے ممکن ہے، امریکا

پیر 19 مئی 2025 14:36

واشنگٹن (اُردو پوائنٹ اخبارتازہ ترین - اے پی پی۔ 19 مئی2025ء) امریکی وزیر خارجہ مارکو روبیو نے کہا ہے کہ یوکرین کے تنازعے پر کوئی واضح پیش رفت اُس وقت ممکن ہے جب صدر ڈونلڈ ٹرمپ اور ان کے روسی ہم منصب ولادیمیر پیوٹن ملاقات کریں گے ۔العربیہ اردو کے مطابق مارکو روبیو نے ایک بیان میں کہا کہ پیش رفت صرف اسی صورت میں ممکن ہے جب صدر ڈونلڈ ٹرمپ اورروسی صدر بالمشافہ ملاقات کریں، صدر ٹرمپ نے اس ملاقات کی خواہش بھی ظاہر کی ہے۔

انہوں نے کہاکہ ہم ایک خونی، مہنگی اور تباہ کن جنگ کو ختم کرنا چاہتے ہیں اس لیے ہمیں تھوڑا صبر درکار ہے۔ انہوں نے اس بات پر بھی زور دیا کہ دنیا میں اور بھی کئی سنگین معاملات موجود ہیں ،ہمارے پاس وقت بہت کم ہے، ہمیں دنیا کے دیگر اہم مسائل کی طرف بھی توجہ دینی ہے۔

(جاری ہے)

یہ بیان ایسے وقت میں سامنے آیا ہے جب مارکو روبیو نے گزشتہ روز روسی وزیر خارجہ سرگئی لاوروف سے فون پر بات چیت کی اور مذاکرات کی تازہ ترین صورتحال سے آگاہی حاصل کی۔

روبیو کے مطابق یہ گفتگو وقت کا ضیاع نہیں تھی۔یاد رہے کہ جمعے کو استنبول میں روس اور یوکرین نے تقریباً تین سال بعد پہلی بار براہ راست مذاکرات کیے۔ یہ پیش رفت یوکرینی صدر ولا دیمیر زیلنسکی کی جانب سے روسی صدر کو براہ راست ملاقات کی پیشکش کے بعد ہوئی تھی جسے روسی صدر نے مسترد کرتے ہوئے ایک سفارتی وفد بھیج دیا ۔اس ملاقات کا نتیجہ یہ نکلا کہ دونوں ممالک کے درمیان تقریباً ایک ہزار قیدیوں کے تبادلے پر اصولی اتفاق ہو گیا ہے۔