بجلی کی طویل لوڈشیڈنگ: کے الیکٹرک نے کراچی والوں کی زندگی جہنم بنادی، کئی علاقوں میں دورانیہ 15 سے 16 گھنٹے تک پہنچ گیا

پیر 19 مئی 2025 16:28

کراچی(اُردو پوائنٹ اخبارتازہ ترین - این این آئی۔ 19 مئی2025ء) کے الیکٹرک نے کراچی والوں کی زندگی جہنم بنادی، شہری لوڈشیڈنگ کیخلاف دن رات سڑکوں پر احتجاج کرنے پر مجبور ہوگئے ہیں۔تفصیلات کے مطابق کراچی میں شدید گرمی کی لہر جاری ہے ، ایسے میں کے الیکٹرک کی جانب سے طویل لوڈ شیڈنگ نے شہریوں کی زندگی اجیرن کردی، کئی علاقوں میں لوڈ شیڈنگ کا دورانیہ 15 سے 16 گھنٹے تک پہنچ گیا۔

کراچی کے علاقے لیاری، کورنگی، لانڈھی، نیوکراچی، نارتھ کراچی، سرجانی، ناظم آباد، ملیر، قائدآباد اورایف بی ایریا کے مختلف بلاکس میں طویل دورانیے کی لوڈشیڈنگ نے لوگوں کو پریشان کر ڈالا۔اس کے ساتھ ساتھ ماڈل کالونی، جہانگیر روڈ، پی آئی بی،مچھرکالونی، ریلوے کالونی،ماڑی پو اور ہاکس بے میں بھی طویل لوڈ شیڈنگ ہورہی ہے۔

(جاری ہے)

بجلی کے جاری بحران نے شہریوں کی مشکلات میں اضافہ کر دیا ہے، خاص طور پر شدید گرمی میں بہت سے لوگ دن اور رات کے طویل عرصے تک بجلی سے محروم رہتے ہیں۔

ترجمان کے الیکٹرک کے مطابق کراچی میں بجلی کی سپلائی معمول کے مطابق جاری ہے، سترفیصد بجلی کا نیٹ ورک لوڈشیڈنگ سے مستثنیٰ ہے۔ترجمان نے کہاکہ 30 فیصد علاقوں میں بجلی چوری اور بلوں کی عدم ادائیگی کا سامنا ہے اور اسی وجہ سے ان علاقوں میں بجلی چوری، عدم ادائیگی کے مطابق لوڈشیڈنگ کی جاتی ہے۔