افتخار علی ملک کی چیف آف آرمی سٹاف جنرل عاصم منیر کو فیلڈ مارشل کے عہدے پر ترقی ملنے پر مبارکباد

منگل 20 مئی 2025 20:20

اسلام آباد (اُردو پوائنٹ اخبارتازہ ترین - اے پی پی۔ 20 مئی2025ء) سارک چیمبر آف کامرس اینڈ انڈسٹری کے سابق صدر افتخار علی ملک نے چیف آف آرمی سٹاف جنرل عاصم منیر کو فیلڈ مارشل کے عہدے پر ترقی ملنے پر دلی مبارکباد پیش کی ہے۔ منگل کو یہاں ایک بیان میں انہوں نے آرمی چیف عاصم منیر کی غیر معمولی و جرأتمندانہ قیادت اور مادر وطن کے دفاع کے لئے ان کے غیر متزلزل عزم کو سراہتے ہوئے کہا کہ یہ عہدہ ملکی سلامتی و خودمختاری کے دفاع اور دشمن کو عبرتناک شکست سے دوچار کرنے کے لئے ان کی سٹریٹجک حکمت عملی کا اعتراف ہے۔

افتخار علی ملک نے کہا کہ چیف آف آرمی سٹاف جنرل عاصم منیر نے قومی سلامتی و ملکی دفاع کے تحفظ، خطے میں امن و استحکام کو یقینی بنانے اور اندرونی و بیرونی خطرات کے خلاف غیر معمولی عزم کا مظاہرہ کیا ہے۔

(جاری ہے)

انہوں نے کہا کہ جنرل عاصم منیر کی کمان میں پاک فوج نے نہ صرف آپریشنل مہارت کو برقرار رکھا ہے بلکہ پیشہ وارانہ مہارت اور حب الوطنی کے عظیم مظاہرے کے ذریعے لوگوں کا اعتماد بھی حاصل کیا ہے۔

انہوں نے مزید کہا کہ تاجر برادری مسلح افواج کے پیچھے مضبوطی سے کھڑی ہے اور ان کی انتھک قربانیوں پر تہہ دل سے شکر گزار ہے۔ انہوں نے امید ظاہر کی کہ آرمی چیف عاصم منیر کی فیلڈ مارشل کے عہدے پر ترقی سے افواج پاکستان کے حوصلے مزید بلند ہوں گے اور تمام تر چیلنجز کا مقابلہ کرنے کے عزم کو مزید تقویت ملے گی۔