Live Updates

ملالہ کا غزہ میں نسل کشی کے خاتمے کیلئے عالمی حکومتوں سے زیادہ سے زیادہ دباؤ کا مطالبہ

ہزاروں بھوک سے مرتے بچوں، سکولوں اور ہسپتالوں کو مسمار کر کے، انسانی امداد کی بندش اور بے گھر خاندانوں کو دیکھ کر دل شکستہ ہوں؛ نوبل انعام یافتہ ملالہ یوسفزئی کی سوشل میڈیا پوسٹ

ساجد علی بدھ 21 مئی 2025 10:13

ملالہ کا غزہ میں نسل کشی کے خاتمے کیلئے عالمی حکومتوں سے زیادہ سے زیادہ ..

لندن ( اُردو پوائنٹ اخبارتازہ ترین۔ 21 مئی 2025ء ) نوبل انعام یافتہ ملالہ یوسفزئی نے غزہ میں نسل کشی کے خاتمے کے لیے عالمی حکومتوں سے زیادہ سے زیادہ دباؤ ڈالنے کا مطالبہ کردیا۔ تفصیلات کے مطابق نوبل انعام یافتہ ملالہ یوسفزئی نے سوشل میڈیا پلیٹ فارم ایکس پر ایک پوسٹ میں کہا ہے کہ غزہ میں اسرائیل کے ظلم و بربریت کو دیکھ کر دکھ ہوتا ہے، میں ہزاروں بھوک سے مرتے بچوں، سکولوں اور ہسپتالوں کو مسمار کر کے، انسانی امداد کی بندش اور بے گھر خاندانوں کو دیکھ کر دل شکستہ ہوں۔

انہوں نے مزید کہا کہ ہماری اجتماعی انسانیت عالمی اور فوری کارروائی کا مطالبہ کرتی ہے، میں ہر عالمی رہنما سے مطالبہ کرتی ہوں کہ وہ اس نسل کشی کے خاتمے اور شہریوں کے تحفظ کے لیے اسرائیلی حکومت پر زیادہ سے زیادہ دباؤ ڈالیں، وہ فلسطینی بچوں کے امدادی فنڈ، INERA، Anera اور UNRWA جیسی غیر منافع بخش تنظیموں کی حمایت میں ان کا ساتھ دیں۔

(جاری ہے)

ملالہ یوسفزئی نے یہ بات دی انڈیپنڈنٹ پر شائع ہونے والے ایک مضمون کو شیئر کرتے ہوئے کہی جس میں اقوام متحدہ کے انسانی ہمدردی کے سربراہ نے خبردار کیا ہے کہ غزہ میں مزید امداد نہ پہنچنے کی صورت میں 48 گھنٹوں کے اندر اندر 14 ہزار بچے ہلاک ہو سکتے ہیں۔

علاوہ ازیں نوبل انعام یافتہ ملالہ یوسفزئی نے اپنی ایک اور سوشل میڈیا پوسٹ میں غزہ میں فلسطینی بچوں کے لیے فوری امداد اور ریلیف اور مستقل جنگ بندی کا مطالبہ کیا، جس میں انہوں نے کہا کہ ’غزہ میں فلسطینی بچوں کو بھوک اور موت کی بدترین صورتحال کا سامنا ہے، بچوں کے بگڑتے حالات دیکھ کر دل دہل جاتا ہے‘۔ انہوں نے بچوں کی سلامتی اور صحت کے لیے دعا بھی کی اور لکھا کہ ’میں ان کے تحفظ اور مستقبل کے لیے دعا گو ہوں، میں فوری امداد اور امداد اور مستقل جنگ بندی کا مطالبہ کرتی ہوں‘، انہوں نے یہ بات غزہ کی پٹی پر اسرائیل کے محاصرے کے اثرات پر نیو یارک ٹائمز کی رپورٹ شیئر کرتے ہوئے کہی۔