تصویریں استعمال نہ کرو، بچے واپس لا، اسرائیلی یرغمالیوں کے والدین کا انتباہ

تل ابیب (اُردو پوائنٹ اخبارتازہ ترین - این این آئی۔ 21 مئی2025ء)اسرائیلی یرغمالیوں کے والدین نیتن یاہو پر برس پڑے، حکومت کو لکھے گئے خط میں انتباہ دیتے ہوئے کہا کہ بس بہت ہو گیا، ہمارے بچوں کی تصویریں سیاسی مقاصد اور جنگ کو طول دینے کیلیے استعمال نہ کریں۔میڈیارپورٹس کے مطابق 7 اکتوبر 2023 کو غزہ کی سرحد سے حماس کی تحویل میں لیے گئے اسرائیلی شہریوں کے والدین نے وزیراعظم بنیامین نیتن یاہو کو سخت الفاظ پر مبنی خط میں مطالبہ کیا کہ حکومت ان کے بچوں کی تصاویر کو سرکاری تشہیر میں استعمال کرنا بند کرے۔

یہ خط اسرائیلی شہری نمرود کوہن، آریئل کونیئو اور ڈیوڈ کونیئو اور ماتان زانگوکر کے والدین کی جانب سے تحریر کیا گیا جنہیں حماس نے اپنی تحویل میں لیا تھا۔خط میں کہا گیا کہ پچھلے ایک سال سے اسرائیلی حکومت نے کروڑوں شیکل ایسی تشہیری مہم پر خرچ کیے جن میں ہمارے بچوں کی تصاویر استعمال کی گئیں، جو ابتدا میں شعور اجاگر کرنے کیلیے ہماری فریاد تھی، وہ اب ایک سیاسی حربہ بن چکی ہے، جو جنگ کو طول دینے کا ذریعہ ہے، نہ کہ یرغمالیوں کی واپسی کو ترجیح دینے کا۔

(جاری ہے)

والدین نے حکومت پر الزام بھی عائد کیا کہ وہ جنگ کو طول دے رہی ہے تاکہ عوامی حمایت برقرار رکھی جا سکے، جبکہ 58 یرغمالیوں کی رہائی کے لیے کوئی مثر اور فیصلہ کن اقدام نہیں کیا جا رہا۔خط میں یہ بھی کہا گیا کہ ہمیں اپنے ہی ملک کے تحفظ پر بھروسہ نہیں رہا، اب ہمیں صدر ڈونلڈ ٹرمپ، اسٹیو وٹکوف اور ایڈم بوہلر جیسے غیر ملکی سفارتی شخصیات پر انحصار کرنا پڑ رہا ہے تاکہ اس تکلیف دہ صورتحال کا کوئی حل نکل سکے۔

والدین نے خبردار کیا کہ غزہ میں بڑھتے ہوئے فوجی دبا سے یرغمالیوں کی زندگیاں مزید خطرے میں پڑ گئی ہیں لہذا ہم اب اپنی اولاد کی تصاویر حکومت کی تشہیری مہم میں استعمال کرنے کی اجازت نہیں دیں گے، اگر حکومت مکمل جنگ بندی اور تمام یرغمالیوں کی بحفاظت واپسی کے لیے سنجیدہ اقدامات نہیں کرتی تو ہم قانونی اور عوامی سطح پر مزید اقدامات کرنے پر مجبور ہوں گے۔خط کے آخر میں والدین نے واضح طور پر کہا کہ یہ ہماری آخری حد ہے، اب صرف باتیں کافی نہیں، یرغمالیوں کو فوری طور پر واپس لایا جائے۔