متحدہ عرب امارات نےعربی زبان میں مصنوعی ذہانت کے لیے ایک نیا ماڈل لانچ کردیا

دبئی (اُردو پوائنٹ اخبارتازہ ترین - اے پی پی۔ 22 مئی2025ء) متحدہ عرب امارات نےعربی زبان میں مصنوعی ذہانت کے لیے ایک نیا ماڈل لانچ کردیا۔ العربیہ کے مطابق خلیجی خطے میں "اے آئی" ٹیکنالوجی کو تیار کرنے کی دوڑ میں شدت آتی جا رہی ہے۔ امارات مصنوعی ذہانت میں عالمی کھلاڑی بننے کے لیے اربوں ڈالر خرچ کر رہا ہے اور اس ٹیکنالوجی کو حاصل کرنے کے لیے امریکہ کے ساتھ اپنے مضبوط تعلقات کا فائدہ اٹھانے کی کوشش کر رہا ہے۔

امریکی صدر ڈونلڈ ٹرمپ نے گزشتہ ہفتے ایک دورے کے دوران کہا تھا کہ متحدہ عرب امارات کے ساتھ مصنوعی ذہانت کا معاہدہ اسے امریکی کمپنیوں کے ذریعہ تیار کردہ مصنوعی ذہانت میں استعمال ہونے والے جدید سیمی کنڈکٹرز حاصل کرنے کی اجازت دے گا۔ اس اقدام کو مبصرین نے خلیجی ریاست کے لیے بہت بڑی جیت قرار دیا۔

(جاری ہے)

فالکن عربی پروجیکٹ، جسے ابوظہبی ایڈوانسڈ ٹیکنالوجی ریسرچ کونسل نے تیار کیا ہے، کو اصلی، غیر ترجمہ شدہ عربی زبان میں اعلیٰ معیار کے ڈیٹا پر تربیت دی گئی ہے۔

اس میں جدید معیاری عربی اور علاقائی بولیاں بھی شامل کی گئی ہیں۔ اس سے اسے عرب دنیا میں لسانی تنوع کو سمجھنے کی اعلیٰ صلاحیت ملی ہے۔ بیان میں مزید کہا گیا ہے کہ فالکن عربی "خطے میں دستیاب تمام عرب ماڈلز سے بہتر کارکردگی کا مظاہرہ کر رہی ہے۔ اس سے یہ ثابت ہوتا ہے کہ سمارٹ ڈیزائن ٹرمپ کے سائز کے مقابلے میں دس گنا بڑے ماڈلز کی کارکردگی کا مقابلہ کرتا ہے۔

ایڈوانس ٹیکنالوجی ریسرچ کونسل کے سیکرٹری جنرل فیصل البنائی نے بیان میں کہا کہ آج اے آئی میں قیادت کی پیمائش سائز سے نہیں بلکہ تاثیر، استعمال میں آسانی اور حل کی جامعیت سے کی جاتی ہے۔ ایڈوانس ٹیکنالوجی ریسرچ کونسل نے فالکن ایچ ون ماڈل بھی لانچ کیا جس کے بارے میں اس نے کہا کہ یہ اہم کمپیوٹنگ وسائل یا جدید تکنیکی مہارت کی ضرورت کو کم کرکے حریف میٹا اور علی بابا کو پیچھے چھوڑ رہا ہے۔

امریکی صدر کے دورہ سعودی عرب کے دوران مصنوعی ذہانت بھی ایک مرکزی مسئلہ تھا۔ سعودی عرب کو امریکہ سے باہر AI سرگرمیوں کے لیے ایک ممکنہ مرکز کے طور پر دیکھا جا رہا ہے۔ اس ماہ کے شروع میں سعودی عرب نےاے آئی ٹیکنالوجی اور انفراسٹرکچر کو تیار کرنے اور ان کا انتظام کرنے کے لیے ایک نئی کمپنی کا آغاز کیا۔ ایک بیان کے مطابق اس کمپنی کا مقصد عربی میں ایک بہترین بڑی زبان کے ماڈلز میں سے ایک تیار کرنا ہے۔