چرس پینے کا الزام؛ سینیٹر ایمل ولی خان کا چیئرمین پی ٹی اے کے استعفے کا مطالبہ

اسلام آباد ( اُردو پوائنٹ اخبارتازہ ترین۔ 22 مئی 2025ء ) عوامی نیشنل پارٹی کے سربراہ سینیٹر ایمل ولی خان نے چرس پینے کے الزام پر چیئرمین پی ٹی اے کے استعفے کا مطالبہ کردیا۔ تفصیلات کے مطابق چیئرمین آغا شاہزیب درانی کی زیر صدارت سینیٹ کی قائمہ کمیٹی کا اجلاس ہوا جہاں چیئرمین پی ٹی اے نے الزام عائد کرتے ہوئے کہا کہ ’ایمل ولی چرس کا سگریٹ پی کر کمیٹی اجلاس میں آئے ہیں، مجھے بھی چرس کا سگریٹ دیں‘، چیئرمین پی ٹی اے کی جانب سے چرس پینے کا الزام عائد کیے جانے وار طنزیہ رویہ اختیار کرتے ہوئے چیئرمین قائمہ کمیٹی سے چرس کے سگریٹ کا تقاضا کرنے پر سینیٹر ایمل ولی خان چیئرمین پی ٹی اے پر بھڑک اٹھے اور انہیں مخاطب کرتے ہوئے کہا کہ ’آپ کو تکلیف کیا ہے؟ ایک سرکاری ملازم مجھے کیسے کہہ سکتا ہے کہ تم چرس پی کر آئے ہو؟‘۔

(جاری ہے)

عوامی نیشنل پارٹی کے سربراہ نے کہا کہ ’ایک سرکاری افسر کا یہ انداز بالکل قابل قبول نہیں، آپ کو یہ جرات کس نے دی ہے کہ ایسے بات کریں؟‘، اس پر چیئرمین پی ٹی اے سینیٹر ایمل ولی خان سے بار بار معافی مانگتے رہے اور کہا کہ ’مجھ سے غلطی ہوگئی ہے‘، تاہم سینیٹر ایمل ولی نے کہا کہ ’اگر آپ چرس اور شراب پیتے ہیں تو ایسی باتیں کیا کریں‘، اس کے ساتھ ہی انہوں نے قائمہ کمیٹی سے چیئرمین پی ٹی اے کے خلاف کارروائی کا مطالبہ کیا۔

سربراہ عوامی نیشنل پارٹی نے کہا کہ ’چیئرمین پی ٹی اے اجلاس میں رہے گا یا میں رہوں گا‘، اس پر چیئرمین پی ٹی اے میجر جنرل ریٹائرڈ حفیظ الرحمان کو قائمہ کمیٹی کا اجلاس چھوڑ کر جانا پڑا، چیئرمین قائمہ کمیٹی نے چیئرمین پی ٹی اے کی بدتمیزی کا معاملہ وزیراعظم کے سامنے اٹھانے کا فیصلہ کیا، اس کے علاوہ انہوں نے قائمہ کمیٹی کی سیکرٹری آئی ٹی کو بھی معاملے کا نوٹس لینے کی ہدایت کی اور کہا کہ ’چیئرمین پی ٹی اے کے رویہ کی مذمت کرتے ہیں، چیئرمین پی ٹی اے نے سینیٹر ایمل ولی کی ہی نہیں بلکہ پوری قائمہ کمیٹی کی توہین کی ہے، وزیراعظم چیئرمین پی ٹی اے کے خلاف ایکشن لیں۔

بتایا گیا ہے کہ اب اس معاملے میں نئی پیشرفت سامنے آئی ہے جس کے تحت عوامی نیشنل پارٹی کے سربراہ سینیٹر ایمل ولی خان نے چرس پینے کے سنگین الزام لگانے پر چیئرمین پی ٹی اے میجر جنرل ریٹائرڈ حفیظ الرحمان کے استعفے کا مطالبہ کر دیا، اس حوالے سے سینیٹر ایمل ولی خان کی جانب سے چیئرمین سینیٹ کو تحریکِ استحقاق پیش کر دی گئی۔ سینیٹ اجلاس کے دوران انہوں نے کہا کہ قبائلی اضلاع میں انٹرنیٹ سہولت پر بحث ہوئی جھوٹ بولنے پر چیئرمین پی ٹی اے کو ٹوکا، مجھے نہیں تھا معلوم کہ یہ ریٹائرڈ جنرل ہے۔

ایمل ولی خان کہتے ہیں کہ میں نے انٹرنیٹ ٹاور کی سکیورٹی پر بات کی اور چلغوزے کے باغ کا کہا جس کے بعد سگریٹ پینے گیا لیکن واپس آنے پر موصوف نے ایسے الفاظ کہے جو ادا کرتے ہوئے مجھے شرم آرہی ہے، یہ میری نہیں اس پوری عمارت کی تضحیک ہے، میں آج سے کمیٹی اجلاسوں کا بائیکاٹ کرتا ہوں، مجھے اپنی عزت پیاری ہے میں اس کے استعفے اور اسے ہٹانے کا مطالبہ کرتا ہوں، اگر چیئرمین کے پاس مائیک کھولنے اوربند کرنے کے علاوہ اختیار ہے تو میں مطالبہ کرتا ہوں کہ میری تحریک استحقاق کو کمیٹی میں بھیجا جائے۔