پاکستان نے امریکا سے کپاس اور سویابین کی درآمدات بڑھانے کی پیشکش کردی ہے

پاکستان 29 فیصد کے ٹیرف سے چھوٹ حاصل کرنے کی کوشش کر رہا ہے، پاکستان کا امریکا کے ساتھ کم تجارتی خسارہ 3 ارب ڈالر کا ہے، وفاقی وزیر خزانہ امریکا میں تجارتی معاہدے کیلئے سرگرم ہیں، امریکی جریدہ

ثنااللہ ناگرہ جمعہ 18 جولائی 2025 23:32

پاکستان نے امریکا سے کپاس اور سویابین کی درآمدات بڑھانے کی پیشکش کردی ..

اسلام آباد (اُردو پوائنٹ اخبارتازہ ترین۔ 18 جولائی 2025ء ) وفاقی وزیر خزانہ محمد اورنگزیب امریکا میں تجارتی معاہدے کیلئے سرگرم ہیں، امریکی جریدے کے مطابق پاکستان نے امریکا سے کپاس اور سویابین کی درآمدات بڑھانے کی پیشکش کردی ہے، پاکستان 29 فیصد کے ٹیرف سے چھوٹ حاصل کرنے کی کوشش کر رہا ہے، پاکستان کا امریکا کے ساتھ کم تجارتی خسارہ 3 ارب ڈالر کا ہے۔

امریکی جریدے بلومبرگ نے بتایاکہ محمد اورنگزیب چاہتے ہیں کہ اگست کی ڈیڈ لائن سے قبل واشنگٹن کے مطالبات پر بات چیت کی جا سکے، اس سے پہلے پاکستانی وفد کو امریکا کی جانب سے ایک مفصل فہرست فراہم کی گئی تھی۔ امریکی جریدے کے مطابق فہرست میں پاکستان سے تجارتی معاہدے کی شرائط پوری کرنے پر زور دیا گیا، پاکستان پر اپنے ٹیرف اور نان ٹیرف رکاوٹوں میں کمی کرنے پر زور دیا گیا، وزارتِ خزانہ نے کہا ہے کہ تجارتی مذاکرات میں حوصلہ افزا پیش رفت ہوئی ہے۔

(جاری ہے)

امریکی جریدے نے کہا کہ پاکستان چاہتا ہے کہ عائد کیے گئے ٹیرف سے ریلیف حاصل کیا جا سکے، پاکستان جولائی کے اوائل میں معاہدہ مکمل کرنے کی توقع رکھتا تھا، پاک امریکا تجارتی مذاکرات کی رفتار توقع سے سست رہی۔ امریکی جریدے نے بتایا کہ اسلام آباد اور واشنگٹن کے درمیان تعلقات میں بہتری کے آثار نظر آ رہے ہیں، یہ بہتر تعلقات ایک طویل سفارتی سرد مہری کے بعد رونما ہوئے ہیں۔

نیوزایجنسی کے مطابق امریکی جریدے بلوم برگ کی رپورٹ میں کہا گیا ہے کہ گزشتہ ماہ امریکی صدر ڈونلڈ ٹرمپ نے پاکستانی آرمی چیف فیلڈ مارشل سید عاصم منیر کا وائٹ ہاؤس میں غیرمعمولی خیر مقدم کیا، اس کے بعد پاکستان نے ڈونلڈ ٹرمپ کو نوبیل امن انعام کے لیے نامزد کرنے کی سفارش کی۔ امریکی جریدے کے مطابق پاکستان اس وقت کرپٹو انڈسٹری کے لیے نرم رویہ اپنا رہا ہے، پاکستان نے اپریل میں ٹرمپ خاندان کی ورلڈ لبرٹی فنانشل کے ساتھ مفاہمتی یادداشت پر دستخط کیے، آرمی چیف کے دورے کے بعد تجارتی مذاکرات میں حوصلہ افزا پیش رفت ہوئی۔

امریکی جریدے کے مطابق پاکستان کا امریکا کے ساتھ تجارتی خسارہ کم ہے جو تقریبا 3 ارب ڈالرز ہے، پاکستان 29 فیصد کے ٹیرف سے چھوٹ حاصل کرنے کی کوشش کر رہا ہے۔ امریکی جریدے نے بتایا کہ پاکستان جنوبی ایشیا کا چین کے بعد امریکی کپاس کا دوسرا سب سے بڑا خریدار ہے، پاکستان نے امریکا سے کپاس اور سویابین کی درآمدات بڑھانے کی پیشکش بھی کی ہے، امریکا پاکستان کی برآمدات کے لیے سب سے بڑی منڈی ہے۔