مورو واقعے کو جواز بنا کر سیاسی مخالفین کے خلاف انتقامی کارروائیاں کی جا رہی ہیں،کنوینر دریائے سندھ بچا ئو

جھوٹی ایف آئی آرز درج کر کے پیپلز پارٹی نے پورے سندھ میں ایک بار پھر خوف اور جبر کی روایت کو قائم رکھنے کے لیے کارروائیاں تیز کر دی ہیں،سید زین شاہ

جمعرات 22 مئی 2025 21:25

کراچی(اُردو پوائنٹ اخبارتازہ ترین - این این آئی۔ 22 مئی2025ء) سندھ یونائیٹڈ پارٹی کے صدر اور کنوینر دریائے سندھ بچا ئوتحریک سید زین شاہ نے اپنے جاری کردہ بیان میں کہا ہے کہ مورو واقعے کے بعد، اس واقعے کو جواز بنا کر سیاسی مخالفین کے خلاف انتقامی کارروائیاں کی جا رہی ہیں۔ جھوٹی ایف آئی آرز درج کر کے پیپلز پارٹی نے پورے سندھ میں ایک بار پھر خوف اور جبر کی روایت کو قائم رکھنے کے لیے کارروائیاں تیز کر دی ہیں۔

مورو واقعے کی مختلف تھانوں میں کئی ایف آئی آرز درج کروائی گئی ہیں، جن میں تمام متحرک کارکنوں اور رہنماں، مرتضی خان جتوئی، مسرور خان جتوئی، اور ہماری پارٹی کے کارکنان صمد حسین بھٹی، اکرم بھٹی اور دیگر کے خلاف جھوٹے اور من گھڑت مقدمات قائم کر کے انہیں ہراساں کیا جا رہا ہے۔

(جاری ہے)

سید زین شاہ نے مزید کہا کہ ہمیں پہلے ہی خدشہ تھا کہ مورو کا واقعہ ایک مینیج دہشت گردی ہے، جسے جواز بنا کر سندھ کی پرامن قومی جمہوری سیاست کو روکنے کی کوشش کی جائے گی لیکن ہم زرداری مافیا اور سندھ حکومت کے تمام غیر آئینی اور غیر قانونی اقدامات کا پرامن، منظم اور قومی یکجہتی کے ساتھ مقابلہ کریں گے اور اپنے ساتھیوں اور کارکنوں کے تحفظ کے لیے قانونی اور عوامی سیاسی جدوجہد کا راستہ اپنائیں گے۔

دوسری جانب، ایس یو پی کے سینئر نائب صدر روشن علی برڑو نے پارٹی کے ساتھیوں کے ایک بڑے وفد کے ساتھ شہید زاہد علی لغاری کے آبائی گاں لغاری بجارانی پہنچے، جہاں انہوں نے شہید کے لواحقین سے تعزیت کی اور ان کے غم میں شریک ہوئے۔