پشاور کے شعبہ بازار، کینٹ اور بورڈ بازار میں تجاوزات مافیا کیخلاف کارروائیاں

جمعہ 23 مئی 2025 10:50

پشاور (اُردو پوائنٹ اخبارتازہ ترین - اے پی پی۔ 23 مئی2025ء) پشاور سٹی ٹریفک پولیس نے تجاوزات مافیا کیخلاف کارروائیاں کرتے ہوئے 68 افراد کو گرفتار کرلیا۔

(جاری ہے)

سٹی ٹریفک پولیس پشاور کے اہلکاروں کی جانب سے شہر بھر میں تجاوزات مافیا کو رضا کارانہ طور پر تجاوزات ختم کرنے کی ہدایت کی گئی تاہم تجاوزات مافیا کی جانب سے اس پر عملدرآمد نہیں کیا جا رہا تھا جس پر سٹی ٹریفک پولیس پشاور کے اہلکاروں کی جانب سے کارروائیاں کی گئیں جس کے تحت سٹی سیکٹر میں آپریشن کے دوران 68 افراد کو گرفتار کر کے دو ٹرک سامان قبضے میں لے لیا۔

ٹریفک ہیڈ کوارٹر گلبہار سے جاری بیان میں چیف ٹریفک آفیسر نے کہا ہے کہ تجاوزات مافیا رضا کارانہ طور پر تجاوزات کا خاتمہ کریں بصورت دیگر ان کے خلاف سخت قانونی کارروائی عمل میں لائی جائے گی کیونکہ تجاوزات قائم کرنے سے ٹرانسپورٹروں اور راہ گیروں کو شدید مشکلات کا سامنا کرنا پڑتا ہے۔ انہوں نے کہا کہ شہری گاڑیاں اور موٹر سائیکلیں پارکنگ سٹینڈ میں کھڑی کریں جبکہ نو پارکنگ زون میں موٹر سائیکلیں اور گاڑیاں کھڑی کرنیوالوں کی گاڑیاں ٹرمینل میں بند کی جائیں گی۔