عثمان بزدار دور ،بہاولنگر کے افسران پر 3 ارب 16کروڑ سے زائد کاریکارڈ چھپانے کا الزام

اس اقدام سے سرکاری فنڈز کے غلط استعمال یا گڑبڑ کا شبہ پیدا ہوتا ہے،رپورٹ کا پی اے سی جائزہ لے گی

اتوار 25 مئی 2025 15:25

لاہور(اُردو پوائنٹ اخبارتازہ ترین - این این آئی۔ 25 مئی2025ء) سابق وزیر اعلیٰ پنجاب عثمان بزدار کے دور میں بہاولنگر کے افسران پر سرکاری فنڈز کا ریکارڈ چھپانے کا الزام سامنے آیا ہے ۔آڈیٹر جنرل آف پاکستان کی رپورٹ 2021-22 پنجاب اسمبلی میں پیش کی گئی ہے جس میں بہاولنگر کے افسران پر 3 ارب 16کروڑ سے زائد کے ریکارڈ چھپانے کا الزام ہے۔

(جاری ہے)

آڈٹ رپورٹ کے مطابق ڈپٹی کمشنر آفس نے 3ارب سے زائد اخراجات اور وصولیوں کا ریکارڈ نہیں دکھایا ۔

رپورٹ میں کہا گیا ہے کہ اس اقدام سے سرکاری فنڈز کے غلط استعمال یا گڑبڑ کا شبہ پیدا ہوتا ہے۔ مزید کہا گیا ہے کہ 2019 -20 کی آڈٹ رپورٹ میں بھی 13 کروڑ سے زائد کی رقم چھپائی گئی تھی ۔ آڈیٹر جنرل نے فوری طور پر مکمل ریکارڈ آڈٹ کو پیش کرنے کی ہدایت کرتے ہوئے کہاہے کہ ذمہ دار افسران کے خلاف کارروائی شروع کی جائے۔تین ارب سے زائد رقم کہاں گئی پنجاب اسمبلی کی پبلک اکاونٹس کمیٹی اس کا جائزہ لے گی۔